Зимни суҳбат Президенти мамлакат ба самтҳои афзалиятноки раёсати Ҷумҳурии Тоҷикистон дар СААД таваҷҷуҳ зоҳир намуда, нақшаи мувофиқашудаи амалиётро барои давраи оянда тасдиқ карданд.

Дар зимн, корҳои анҷомдодаи котибот дар самти омодасозии нақшаи мазкур ва хулосаи афзалиятҳои раисии Тоҷикистон бо ташаббусҳои сарварони давлатҳои аъзои созмон, ки дар иҷлосияи декабрии Шӯрои амнияти дастаҷамъии соли гузашта садо дода буданд, таъкид шуд.

Дар идомаи суҳбат ҷонибҳо вазифаҳои имрӯзаи СААД ва баъзе масъалаҳои мубрами рӯзномаи минтақавӣ ва байналмилалиро мавриди баррасӣ қарор доданд.

Президенти Ҷумҳурии Тоҷикистон аҳамияти таҳкими ҳамкориҳоро дар доираи СААД барои муборизаи судманд бо тамоюлҳои паҳншавии ғояҳои радикалии харобиовар дар минтақаи масъулияти созмон, инчунин, мубориза бо киберҷиноятҳо ва дигар амалҳои ғайриқонунии истифодаи технологияи иттилоотӣ - коммуни-катсиониро махсус зикр намуданд.

Дар баробари ин, муҳимияти пурзӯр сохтани корҳо ҷиҳати татбиқи қарори Шӯрои амнияти дастаҷамъӣ “Дар бораи рӯйхати тадбирҳои иловагӣ оид ба паст кардани ташаннуҷ дар минтақаи сарҳадии Тоҷикистону Афғонистон” барои таҳияи масъалаи қабули рӯйхати ягонаи ташкилотҳое, ки дар сиғаи СААД террористӣ шинохта шудаанд, таъкид гашт.

Ҳангоми баррасии масъалаҳои рӯзномаи байналмилалӣ ва минтақавӣ ба мураккабшавии вазъи Афғонистон, инчунин, ба тамоюли афзоиши таҳдидҳои глобалии терроризм, экстремизм, шаклҳои гуногуни радикализм ва ҷинояткории муташаккилонаи фаромиллӣ, аз ҷумла гардиши ғайриқонунии маводи мухаддир, таваҷҷуҳи махсус зоҳир гардид.

Дар робита ба ин, Сарвари давлат муҳтарам Эмомалӣ Раҳмон таҳкими неруи СААД-ро барои муборизаи самаранок бар зидди хатарҳо ва таҳдидҳои амниятӣ зарур шумурданд.