Тафтишот муайян намуд, ки номбурда бо шаҳрванд Фотима Маҳмадиева моҳи феврали соли 2019 тариқи динӣ ақди никоҳ баста, давоми зиндагии якҷоя байнашон баҳсу мунозира ба вуҷуд омада, Қ. Қурбонов чанд бор ҳамсарашро зери лату кӯб қарор додааст. Дар натиҷа, завҷааш осебҳои гуногуни ҷисмонӣ гирифтааст.

Қ. Қурбонов дар мурофиаи судӣ сабаби сар задани муноқишаи байнашонро шарҳ дода гуфт, ки ӯ соли 2002 бо шаҳрванд Моҳрухсор Давлатова оила барпо намуда, аз зиндагии якҷояашон соҳиби панҷ фарзанд гардидаанд. Соли 2017 аз ҳамдигар ҷудо шуда, бо Ф. Маҳмадиева оила барпо кард. Фарзандони аз собиқ завҷааш ба хонааш меомаданд. Ин ба Ф. Маҳмадиева маъқул наафтода, бо фарзандони шавҳараш муносибати хуб надоштааст. Ӯ аз ин амалҳои занаш ба ғазаб омада, дар натиҷаи муноқиша се маротиба Ф. Маҳмадиеваро лату кӯб намудааст.   

Ҷабрдида Фотима Маҳмадиева дар мурофиаи судӣ иброз дошт, ки нофаҳмиҳои дар байнашон бударо бо ҳамдигарфаҳмӣ муросо кардаанд. Нисбат ба шавҳараш ягон даъво надорад, бо муроҷиаташ ба мақомоти ҳифзи ҳуқуқ танҳо мехостааст, ки каме ҳам бошад, ба нофаҳмиҳо хотима бахшад. Аз ин рӯ, аз суд хоҳиш менамояд, ки нисбат ба шавҳараш ҷазо таъйин накунад, зеро ӯ ягона саробони оила мебошад. 

Ҳамин тариқ, суд талаботи қонунгузории Ҷумҳурии Тоҷикистонро ба инобат гирифта, Қурбоналӣ Қурбоновро дар содир намудани ҷиноят бо моддаи 117 қисми 2 банди «в» Кодекси ҷиноятӣ (Азобу уқубат нисбати баръало ноболиғ ё шахсе, ки нотавон будани ӯ барои гунаҳгор аён аст…) гунаҳгор дониста, ба муддати се сол аз озодӣ маҳрум кард. 

Вале, суд хусусият ва дараҷаи хавфнокии ҷиноятро таҳлил намуда, ба хулоса омад, ки аз сабабе, ки ҷабрдида Ф. Маҳмадиева нисбат ба Қ. Қурбонов даъво надорад, инчунин, судшаванда ба гуноҳи худ пурра иқрор буда, сидқан пушаймон аст, дар асоси моддаи 71 Кодекси ҷиноятӣ ҷазои асосиро шартан татбиқ накарда, нисбат ба ӯ як сол муҳлати санҷиширо таъйин намояд.     

 

М. РАҲМОНЗОДА, 

муовини якуми раиси суди шаҳри Ваҳдат