Бешак, Паёми навбатии Президенти мамлакат муҳтарам Эмомалӣ Раҳмонро метавон ҳидояти ҷавонон ба хизмати содиқона ба ин марзу бум арзёбӣ кард. Ҳатто дар чанд ҳолат, ки Пешвои миллат дар иртибот ба муҳаббат ба Ватан ҳарф мезаданду аз ҳамдиёрон, хусусан ҷавонон,  тақозои хизмати арзандаю фаъол ҷиҳати рушду ободии кишварро гӯшрас мекарданд, аз ҳаяҷон гиря гулугирамон мекард. Воқеан, Сарвари давлат барои мо - ҷавонон намунаи олии ватандорию ватандӯстӣ мебошанд. 

Президенти мамлакат муҳтарам Эмомалӣ Раҳмон, аз ҷумла дар Паёми навбатии худ ба Маҷлиси Олӣ таъкид доштанд: “Ҳалли масъалаҳои иҷтимоӣ, яъне соҳаҳои илму маориф ва тандурустӣ ҳамеша дар меҳвари сиёсати давлату Ҳукумати мамлакат қарор дорад. Мо барои боз ҳам беҳтар кардани сатҳу сифати таълим дар ҳамаи зинаҳои таҳсилот бояд тамоми шароити заруриро муҳайё карда, дар ин раванд масъулияти падару модар, аҳли ҷомеа ва омӯзгоронро боз ҳам баланд бардорем”.

Мо ки худ омӯзгориро пеша кардаем, аз ин ҳарфҳои Пешвои миллат дар иртибот ба беҳтар кардани сифати таълиму тарбия масъулияти ҷиддиро дарк карда, бояд ҷавобан ба ғамхориҳои Ҳукумат ва давлат нисбат ба соҳаи маориф, ки солҳои охир анҷом дода мешаваду доимӣ дар мадди назари Пешвои миллат қарор дорад, аз пештара дида, мутобиқ ба талаботи рӯзу давр дар такопӯй бошем. Муассисае, ки мо адои вазифа мекунем барои шаҳру навоҳии вилояти Суғду мамлакат мутахассисони соҳаи тибро омода месозад. Албатта, мутахассиси арзандаи соҳаи худ будан як тарафи масъала асту ҷаҳонбинии васеъ доштан тарафи дигари масъала. 

Бо дарки ҳамин масъулият мо - устодони фанҳои ҷамъиятӣ пайваста кӯшиш ба харҷ медиҳем, ки мутахассисони ояндаи тиб дар самтҳои гуногуни соҳа, бо бархӯрдорӣ аз нозукиҳои соҳаи худ, ҳамзамон, дорои ҷаҳонбинии васеъ, огоҳ аз таърихи халқи худу анъанаҳои бузурги он бошанду дар оянда, баъди хатми коллеҷ бо мизоҷон, ки одамони синну сол ва касбу кори гуногун ҳастанд муомилаи хушу муносибати касбиро раво бинанд.

 

Инобат ГАДОЙБОЕВА, 

Гулнора ВАЛИҶОНОВА, 

устодони муассисаи давлатии коллеҷи тиббии 

шаҳри Хуҷанд ба номи Юсуф Исҳоқӣ