Суди шаҳри Хуҷанд Исмоил Рустамзода, муовини сардори раёсат оид ба масъалаҳои баҳодиҳӣ ба буҷети давлатӣ ва иҷроиши он дар Палатаи ҳисоби Ҷумҳурии Тоҷикистонро дар содир намудани ҷиноят бо моддаи 319 қисми 1 Кодекси ҷиноятии Ҷумҳурии Тоҷикистон (гирифтани пора аз ҷониби шахси мансабдор…) гунаҳкор донист. Бо ҳалномаи суд, ки нусхаи он дар ихтиёри «Ҷумҳурият» қарор дорад, ба ӯ ҷазо дар намуди ҷарима ба андозаи се ҳазору ҳафтсад нишондиҳанда барои ҳисобҳо, баробар ба 214 600 сомонӣ, ба фоидаи давлат, бо маҳрум кардан аз ҳуқуқи ишғоли мансабҳо дар Палатаи ҳисоб  ба муҳлати 2 сол таъйин шуд.

Аммо коллегияи судӣ оид ба парвандаҳои ҷиноятии суди вилояти Суғд ҳукми суди марҳилаи якумро тағйир дода, маблағи ҷазоро 63 800 сомонӣ муайян кард. Суди вилоят далели ин амрро ба он марбут медонад, ки суди марҳилаи якум ҳолатҳои сабуккунандаи ҷазо ва шахсияти маҳкумшударо пурра ба эътибор нагирифтааст. 

Ин дар ҳолест, ки моддаи 319 қисми 1 Кодекси ҷиноятӣ чунин муқарраротро пешбинӣ кардааст: «Аз ҷониби шахси мансабдор шахсан ё ба воситаи миёнарав гирифтани пора дар намуди пул, коғазҳои қиматнок, дигар молу мулк, ё фоидаи дорои характери молу мулкӣ дошта, барои иҷро кардан ё накардани амали муайян ба манфиати порадиҳанда ё намояндагони ӯ, агар чунин ҳаракат (беҳаракатӣ) ба доираи ваколати хизматии шахси мансабдор, шахси мансабдори давлати хориҷӣ ё шахси мансабдори ташкилоти байналмилалӣ дохил бошанд ё онҳо вобаста ба қудрати мавқеи мансабиашон ба чунин ҳаракат (беҳаракатӣ) мусоидат карда метавонанд, ҳамчунин барои пуштибонии умумӣ ё саҳлангорӣ дар хизмат бо ҷарима ба андозаи аз се ҳазору шашсаду панҷоҳ то нуҳ ҳазору яксаду бисту панҷ нишондиҳанда барои ҳисобҳо ё маҳрум сохтан аз озодӣ ба муҳлати то панҷ сол бо маҳрум кардан аз ҳуқуқи ишғоли мансабҳои муайян ё машғул шудан ба фаъолияти муайян ба муҳлати то се сол ҷазо дода мешавад». 

Дар ҳалномаи суд омадааст, ки Исмоил Рустамзода дар асоси фармоиши раиси Палатаи ҳисоби Ҷумҳурии Тоҷикистон аз 1 июни соли 2018 то инҷониб дар вазифаи муовини сардори раёсат - сардори шуъбаи назорати ташаккул ва иҷроиши буҷети давлатии раёсат оид ба масъалаҳои баҳодиҳӣ ба буҷети давлатӣ ва иҷроиши он кор карда истода, ҳамчун шахси мансабдори давлатӣ дар чунин ҳолат ба содир намудани ҷиноят (гирифтани пора) даст зад. 

Ӯ дар асоси шаҳодатномаи раиси Палатаи ҳисоб аз 6 августи соли 2020 ба ҳайати гурӯҳи аудити молиявӣ оид ба баҳодиҳӣ ба ташаккул ва иҷроиши қисми даромад ва хароҷоти буҷети маҳаллии вилояти Суғд дар давраи аз моҳи июли соли 2018 то моҳи августи соли 2020 аз 10 то 30 августи соли 2020 шомил шудааст. И. Рустамзода 20 августи соли 2020 ҷиҳати гузарондани аудити молиявӣ ва арзёбии ҳисоботҳои ҷамъбастӣ ба Муассисаи давлатии тандурустии «Маркази клиникавӣ - эндокринологии вилояти Суғд» ба номи Ҷ. Набиев ташриф оварда, ба аудити молиявии муассисаи зикршуда шурӯъ кардааст. Ӯ зимни аудити интихобии риояи тартиби дурусти истифодаи меъёрҳои сохтмонӣ дар санадҳои корҳои иҷрошудаи таъмиру сохтмон ва асоснокии ҳаҷми корҳои иҷрошуда дар марказ муайян кардааст, ки соли 2018 аз ҷониби ташкилоти ҷамъиятии «Клуби футболи 20-солагии Тоҷикистон» таъмири бинои маркази клиникии болозикр анҷом дода шудааст.

И. Рустамзода ҳангоми дар маркази клиникии болозикр, воқеъ дар шаҳри Хуҷанд қарор доштанаш қасди гирифтани пораро пеша намуда, 21 августи соли 2020 шаҳрванд Зокирҷон Ҷабборовро ҳамчун сармураббии ташкилот ба наздаш даъват карда, аз ӯ барои нагузарондани аудити ташкилоти ҷамъиятии «Клуби футболи 20-солагии Тоҷикистон» вобаста ба тартиби дурусти истифодаи меъёрҳои сохтмонӣ, ки иҷрои амали мазкур ба ваколати хизматиаш дохил мешуд, ба сифати пора 10000 сомонӣ талаб кардааст.

Минбаъд, И. Рустамзода ҷиҳати амалӣ кардани нақшаи ҷиноятии тарҳрезикардааш, 26 августи соли 2020 аз шаҳрванд З. Ҷабборов дар дохили утоқи кории сартабиби маркази клиникавӣ дар навбати аввал ҳамчун пора 4000 сомониро гирифта, овардани боқимонда 6000 сомонии дигарро талаб кардааст. Сипас, зимни гузарондани чорабиниҳои фаврӣ-тафтишотӣ 27 августи соли 2020 И. Рустамзода баъди аз шаҳрванд З. Ҷабборов гирифтани 6000 сомонӣ ба сифати пора боздошт шуд.

 

М. МИРЗОЁН, «Ҷумҳурият»