26 январи соли 2021 зимни ироаи Паёми навбатии хеш ба Маҷлиси Олӣ Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба рушди бонизоми тамоми соҳаҳои афзалиятноки мамлакат таваҷҷуҳи хоса зоҳир намуданд. Паёми навбатӣ, ки дар оғози соли таърихиву ҳумоюн, сиюмин солгарди Истиқлолу озодии Ватани азизамон пешниҳод гардид, ба қалби пиру барнои кишвар шодиву нишот ва умеду бовари комил бахшида, роҳнамову дастури кори ҳар фарди ватандӯсту хештаншинос гардид.

Кумитаи меъморӣ ва сохтмон дар ҳамкорӣ бо мақомоти иҷроияи ҳокимияти давлатии шаҳру ноҳияҳо, ширкатҳои сохтмони вазорату идораҳо ҷиҳати татбиқи дастурҳои ироагаштаи Пешвои муаззами миллат ҳамкориҳои самаранокро ба роҳ мондааст. Корҳои сохтмонию ободонӣ дар иншооте, ки ба истифода додани онҳо дар шаҳру ноҳияҳои ҷумҳурӣ ба муносибати ҷашни миллӣ ба нақша гирифта шудаанд, зери назорати мутахассисони кумита қарор доранд. Дар асоси санҷишҳои дар ин самт гузарондашуда дар шаҳру ноҳияҳои тобеи маркази ҷумҳурӣ, шаҳри Душанбе, вилоятҳои Хатлону Суғд ва Вилояти Мухтори Кӯҳистони Бадахшон мунтазам маълумоти муфассал ба Ҳукумати кишвар пешниҳод мегардад.

Ҷойгиршавии бинову иншооти интихобшуда дар маҳал тавассути корхонаҳои фаръии КВД «Лоиҳакаш» - и кумита, ки дар ҳар шаҳру ноҳия фаъ-олият менамоянд, амалӣ мешаванд. Ҳамчунин, кумита вобаста ба татбиқи лоиҳаи сохтмони биноҳои нави Парлумон ва Ҳукумати Ҷумҳурии Тоҷикистон ва ҳалли масъалаҳои ҷойдошта дар ин самт дар ҳамкорӣ бо мақомоти дахлдор чораҷӯӣ намуда истодааст. Айни замон корҳои сохтмонӣ дар иншооти зикршуда оғоз гардидаанд. 

Соли гузашта пайомадҳои пандемияи коронавирус ба иқтисодиёти кишварҳои ҷаҳон, аз ҷумла ба рушди иқтисоди миллӣ, буҷети давлатӣ, гардиши савдои хориҷӣ, қурби асъори миллӣ, инчунин, ба фаъолияти корхонаҳои саноативу муассисаҳои хизматрасонии мо низ таъсири манфии худро расонд. Аммо Тоҷикистон бо татбиқи сиёсати хирадмандона, таҳти сарварии Пешвои миллат муҳтарам Эмомалӣ Раҳмон бо вуҷуди мушкилоти пешомада, ҷиҳати пешгирии пайомадҳои буҳрон ва ҳифзи амнияти иқтисодии мамлакат як қатор чораҳои фавриро роҳандозӣ намуд. Дар натиҷа, танҳо соли сипаришуда аз сармояи асосие, ки дар соҳаи сохтмон сарф шудааст 11 миллиарду 616 миллион сомониро ташкил медиҳад. Танҳо дар ин давра 1 миллиону 383 ҳазор метри мураббаъ хонаҳои истиқоматӣ ба истифода дода шуданд. Ҳамчунин, муассисаҳои таҳсилоти миёнаи умумӣ барои 13534 ҷойи нишаст, беморхона 577 кат, дармонгоҳ барои қабули 436 нафар дар як баст ва муассисаҳои томактабӣ барои 1000 ҷой мавриди баҳрабардорӣ қарор гирифтанд. 

Аз 65 шаҳру ноҳияҳои кишвар нақшаи генералии 64 - тои он бо қарорҳои Ҳукумати кишвар тасдиқ ва мавриди амал қарор доранд. Нақшаи генералии ноҳияи Данғара ҳоло ба итмом расида, дар мувофиқа аст. 

Аз ин бармеояд, ки сарфи назар аз пандемия Тоҷикистон буҳрони пешомадаро бо сарбаландӣ паси сар намуд, чун иқтисодиёти кишвар дар ин сол 4,5 дарсад афзоиш ёфта, ҳаҷми маҷмӯи маҳсулоти дохилӣ ба 82,5 миллиард сомонӣ баробар гардид. Ҳамин тавр, мо метавонем, аз ҳар нуктаи Паёми Пешвои миллат як фатҳу як навиди хушро ба худ гирем. Паёми Сарвари давлат номаест, ки ҳамаи моро ба сохтану ободӣ, дӯст доштани Ватану ҳифзи он таҳрик медиҳад. Аз ҳамин зовия моро мебояд, ки Паёми Пешвои миллатро нукта ба нукта омӯзем, аз худ кунем ва онро дар амал татбиқ намоем. Чун роҳи саодату некбахтӣ ва ояндаи дурахшони мо, тоҷикистониён дар он таҷассум ёфтааст.

 

Маҳмадсаид ЗУВАЙДЗОДА,

раиси Кумитаи меъморӣ ва сохтмони

назди Ҳукумати Ҷумҳурии Тоҷикистон