Зан ояндасозу бунёдгари миллату давлат аст. Чунки асоси тарбияи насли наврасро зан бар дӯши худ гирифтааст. Бидуни шубҳа, пойдевори ахлоқу адаб, озодагиву сарбаландии фарзандро дар хонавода модар мегузорад.

Хушбахтона, дар замони шӯравӣ бо зӯриву зорӣ ва гоҳо ба зар ҳукумати вақт кӯшид, ки духтарон босавод бошанд. Ин раванд тоза ҷон мегирифт, ки ИҶШС барҳам хӯрд ва аксари давлатҳои пасошӯравиро нооромиҳо фаро гирифт. Аз ҷумла, дар Тоҷикистон оташи ҷанги шаҳрвандӣ аланга зад. Дар чунин давраи ҳассосу пурмоҷаро аз байни мардум шахсияте, ҷавонмарди хуштолеъ, умеди охирини миллати тоҷик Эмомалӣ Раҳмон зуҳур кард.  

Ҳангоми  ироаи  Паёми  навбатии Президенти Ҷумҳурии Тоҷикистон муҳтарам Эмомалӣ Раҳмон ба Кумитаи кор бо занон  ва оила супориш доданд, ки лоиҳаи Қарори Ҳукумати Ҷумҳурии Тоҷикистонро дар бораи "Стратегияи миллии фаъолгардонии нақши занон  дар Ҷумҳурии Тоҷикистон барои солҳои 2021 - 2030" ва нақшаи амалисозии онро барои солҳои 2021 - 2025 таҳия ва пешниҳод намоянд. Аз ҷумла, гуфтанд: “Ҳукумати мамлакат ташаббусҳои занону бонувони кишварро минбаъд низ дастгирӣ карда, ба хотири ҷалби бештари онҳо ба вазифаҳои роҳбарикунанда тадбирҳои иловагиро амалӣ мегардонад”.

Ёдовар мешавем, ки 23 декабри соли 2020 дар шаҳри Душанбе 10 - солагии қабули Стратегияи миллии фаъолгардонии нақши занон дар Тоҷикистон натиҷагирӣ ва таҳияи лоиҳаи нави Стратегияи мазкур барои солҳои 2020 - 2030 баррасӣ гардида буд. Ин санад яке аз муҳимтарин ҳуҷҷатҳоест, ки ба ҳалли масъалаҳои дарки зарурияти таъмини баробарии гендерӣ  ва татбиқи сиёсати гендерӣ аз ҷониби ҷомеа, номукаммал будани заминаҳои қонунгузорӣ дар ин самт, ҷой доштани ақидаҳои мухталиф бобати нақш ва мақоми зан дар ҷомеа, нокифоя будани ҳамкории тарафайни мақомоти давлатӣ ва ташкилоти ҷамъиятӣ дар масъалаи ҳифзи ҳуқуқу манфиатҳои занон, ҷой додани мушкилот дар амалисозии ҳуқуқҳои занон дар соҳаҳои мухталифи сиёсату меҳнат, иқтисоду фарҳанг равона гардида, дар доираи 9 боби таҳияшуда масоили зикргардида бо ҳадафҳои расидан ба мақсадҳо инъикос мекунад. 

Мо - бонувони кишвар аз ғамхории Сарвари давлат муҳтарам Эмомалӣ Раҳмон нисбат ба занону бонувони мамлакат миннатдорем. Таваҷҷуҳ ба занону бонувон чун гурӯҳи муташаккили иҷтимоӣ дар Паём шаффоф ва мисли оина мушоҳида шуд. Баъди ба даст овардани соҳибистиқлолӣ дар сиёсати давлату Ҳукумати Тоҷикистон бо кор таъмин шудани аҳолӣ, хусусан занону бонувон, мавқеи асосиро ишғол менамоянд. 

Чораандешиҳои мазкур далели он аст, ки роҳбари кишвар дар бунёди ҷомеаи демократӣ ба Зан – Модар такя мекунанд ва бовар доранд, ки ояндаи босаодатро занону мардон дар якҷоягӣ меофаранд. 

 

Латофат АБДУЛЛОЕВА,

устоди Донишкадаи сайёҳӣ, 

соҳибкорӣ ва хизмат