Кормандони мақомоти милитсия дар ноҳияи Мир Сайид Алии Ҳамадонӣ марди 28-соларо ба гумони содир намудани ҷинояти одамкушӣ дастгир намуданд.

Тибқи иттилои маркази матбуоти Вазорати корҳои дохилӣ, боздоштшуда 11 марти соли ҷорӣ дар назди бинои истиқоматиаш дар Ҷамоати шаҳраки Москваи ҳамин ноҳия бо ҷавони 22-сола муноқиша карда, бо ду зарби корд ӯро ба ҳалокат расондааст.

Ҳоло нисбат ба гумонбар бо моддаи 104, қисми 1 Кодекси ҷиноятӣ (одамкушӣ, яъне қасдан аз ҳаёт маҳрум сохтани одами дигар) парвандаи ҷиноятӣ оғоз шудааст, ки ин банди қонун ҷазои маҳрум сохтан аз озодӣ то понздаҳ солро пешбинӣ менамояд.

 

 

РИШВАСИТОНӢ.  КОРМАНДИ КОМИССАРИАТИ ҲАРБИРО 

БА ТОЛОРИ СУД БУРД

Агентии назорати давлатии молиявӣ ва мубориза бо коррупсияи Ҷумҳурии Тоҷикистон хабар дод, ки парвандаи ҷиноятӣ нисбат ба корманди комиссариати ҳарбии шаҳри Исфара Рамазон Саидзода баъд аз анҷоми тафтиши пешакӣ ва тасдиқи фикри айбдоркунӣ ба суд ирсол гардид.

Тавре манбаъ иттилоъ медиҳад, номбурда, ки ба ҳайси ёрдамчии калони зершуъбаи 2-и комиссариати ҳарбии шаҳри Исфара фаъолият мекард, бо истифода аз мақоми хизматӣ аз шаҳрванд А. Алибоев барои аз хизмати ҳарбӣ озод намудани бародараш – О. Алибоев бо роҳи қаллобӣ 9500 сомонӣ гирифтааст.

Тафтиши парвандаи ҷиноятӣ нисбат ба ӯ бо моддаи 247, қисми 2, бандҳои «в, г» Кодекси ҷиноятӣ (қаллобӣ бо расондани зарари ҷиддӣ ба шаҳрванд ва бо истифода аз мақоми хизматӣ) анҷом шудааст.

 

 

ҒОРАТГАРӢ. БОЗДОШТИ ҶАВОНОНЕ, КИ ҚАБЛАН НИЗ ДАСТ БА ҶИНОЯТ ЗАДААНД

Дар шаҳри Бохтар ду нафар, ки сомонаи ВКД аз онҳо ҷавонони 19 ва 21- сола ном мебарад, ба гумони ғоратгарӣ боздошт гардиданд.

Гумонбарон 10 марти соли ҷорӣ дар кӯчаи Осимии шаҳри Бохтар марди 45-соларо латукӯб намуда, бо роҳи ошкоро аз ҷайбаш 240-сомониро тасарруф ва аз ҷойи ҳодиса ғайб мезананд. Гуфта мешавад, ки ҷавонони дастгиршуда, қаблан низ даст ба ҷиноят зада, яке бо моддаи 244, қисми 2 (дуздӣ) ва дигарӣ бо моддаи 248, қисми 2 (ғоратгарӣ) Кодекси ҷиноятӣ суд шудаанд. 

 

Шуъбаи ҳуқуқи рӯзномаи «Ҷумҳурият»