Раҳим Санъат Асо, сардори хадамот, иброз дошт, ки зимни гузарондани назорати техникӣ нозирони хадамот 1249 банди вайронкуниҳои санадҳои меъёрии ҳуқуқиро ошкор карданд. Барои бартараф кардани камбудиҳо дар корхонаҳои зериназоратӣ 182 санад - нишондод ва 10 нишондод оид ба боздошти  кор пешниҳод гардид.

Дар ин муддат барои риоя накардани қоидаҳои бехатарии саноатӣ 340 шахси ҳуқуқӣ, мансабдор ва воқеии корхонаҳои бақайдгирифташуда, ба маблағи 848 357 сомонӣ ҷарима баста шуд, ки нисбат ба соли қаблӣ 194 967 сомонӣ зиёд аст. 

Тибқи тартиби муқарраргардида, ба 191 корхонаву ташкилот иҷозатномаи фаъолият, 96 шаҳодатнома барои хариди маводи тарканда, 43 шаҳодатнома барои истифодаи анборҳои маводи тарканда ва 157 иҷозат барои корҳои таркишӣ дода шуд. Инчунин, 1749 корманди муҳандисию техникии корхонаҳои зериназоратӣ аз санҷиши малакаи дониш гузаштанд. Соли гузашта дар корхонаву ташкилот ва иншооти бақайдгирифташуда 31 ҳодисаи нохуш рух дода, 8 кас ҳалок ва 33 нафар ҷароҳати ҷисмонӣ бардошт. 

Ба гуфтаи Раҳим Санъат Асо сабабҳои асосии ҳодисаҳои нохуш бемасъулиятии муҳандисони техникии корхонаҳо дар ҷойи ҳодиса, беаҳамиятии ҷабрдидагон ҳангоми кор бо иншооти хатарнок, риоя нагардидани қоидаҳои бехатарии саноатӣ дар рафти кор бо иншооти истеҳсолии хатарнок, сарфи назар шудани технологияи коркарди кон,  ҳамчунин, норасоии мутахассисони соҳавӣ мебошад.

Дар ҳамаи ҳодисаҳои нохуш тафтишоти техникӣ гузаронда, парвандаҳо ба мақомоти прокуратураи шаҳру ноҳияҳо ирсол гардид. Хадамот бо мақсади назорати риояи қоидаҳои бехатарии саноатӣ ва пешгирии ҳодисаҳои нохуш ва садамаҳои истеҳсолӣ бо роҳбарони корхонаҳо вохӯрӣ гузаронда, машварат ва корҳои фаҳмондадиҳӣ баргузор карданд. 

Илова бар ин, аз ҷониби кормандони хадамот дар Неругоҳи барқи обии “Роғун” тафтиши 15 ҳодисаи нохуш гузаронда шуда, маълум гардид, ки дар натиҷа 3 корманд ба ҳалокат расида, 15 кас ҷароҳати гуногуни ҷисмонӣ бардоштаанд. Сабабҳои асосии ҳодисаҳои нохуш риоя нагардидани талаботи техникаи бехатарӣ, номукаммал гузарондани дастурдиҳӣ дар ҷойи кор аз ҷониби шахсони масъули техникӣ, бо ҳавои тозаи кофӣ таъмин нагардидани қитъаҳои кории зеризаминӣ, ҳамчунин, муҷаҳҳаз нагардидани мавзеъҳои корӣ бо гӯшаҳои техникаи бехатарӣ, дастурамал оид ба ҳифзи меҳнат, лавҳаҳо ва ашёҳои аёнии омӯзишӣ мебошад.

- Хадамот тасмим дорад, ки дар доираи салоҳиятҳои худ бо назардошти баланд бардоштани сатҳи дониши кормандони соҳавӣ дар корхонаҳои истеҳсолии саноатӣ, тарзи дуруст ба роҳ мондани ҳуҷҷатгузории техникӣ ва қабули иншооти ҷашнӣ тибқи риояи талаботҳои бехатарии саноатӣ, ҳамчунин, баҳри амалишавии ҳадафи чоруми стратегии кишвар – саноатикунонии босуръат саҳми назаррас гузорад, - гуфт Раҳим Санъат.