Барои омӯзгор хушбахттарин лаҳза онест, ки шогирдони муваффақ ба дастовардҳои назаррас ноил мегарданд. Имрӯзҳо ҷавонони зираку ҳушёри мо бо сайю талош ва кӯшиш дар тамоми соҳаҳои иқтисодиёти кишвар фаъолият менамоянду ҳиссаи худро баҳри рушду нумӯи кишвари азизамон - Тоҷикистон мегузоранд. 

 

Пешвои миллат муҳтарам Эмомалӣ Раҳмон соли 2017-ро «Соли ҷавонон» эълон доштанд, ки он сиёсати оқилонаи Сарвари давлатамон имрӯз ҳосили пурсамари хешро дода истодааст. Хидмати Пешвои миллат ба ҷавонон ҷиҳати аз худ намудани илмҳои замон ва наслҳои оянда хеле назарас аст. Дар ин раванд фармону амрҳои Президенти Ҷумҳурии Тоҷикистон мавқеи махсус дошта, боло бардоштани стипендияҳои донишҷӯёну хонандагон ва ҷорӣ намудани озмунҳои ҷумҳуриявӣ мавриди зикри хос аст. Аз ҷумла, бо фармонҳои Президенти Ҷумҳурии Тоҷикистон аз 31 октябри соли 2005 «Дар бораи зиёд намудани андозаи стипендияи донишҷӯёни муассисаҳои таҳсилоти олӣ ва миёнаи касбии Ҷумҳурии Тоҷикистон», аз 14 июли соли 2005 «Дар бораи таъсиси стипендияҳои Президенти Ҷумҳурии Тоҷикистон барои хонандагони мактабҳои таҳсилоти умумӣ, литсейҳо, гимназияҳо, омӯзишгоҳҳои касбӣ - техникӣ, омӯзишгоҳҳо, техникумҳо ва коллеҷҳо» ҷиҳати ноил шудан ба  ҳадафҳои ояндабинонаамон, ки ба самти ҷавонон нигаронда шудаанд, мусоидат намуданд.

Ҳоло дар мамлакати мо боварии Ҳукумати кишвар маҳз ба ҷавонони ояндабину дурандеш равона гардидааст. Пешвои миллат муҳтарам Эмомалӣ Раҳмон дастгир ва ҳидоятгари  ҷавонон ҳастанд ва онҳоро мебояд кӯшиш намуда, дар оянда ҳамчун мутахассиси босалиқа саҳми хешро барои боз ҳам ободу зебо гардондани давлатамон бигузоранд.

Воқеан, ҷавонони тавоно ва соҳибилму эҷодкор номвари давлату миллати хеш мегарданд. Имрӯзҳо давлату Ҳукумат барои ҷавонон тамоми шароитҳоро муҳайё сохта, онҳоро сӯи умеду орзу ва ояндаи дурахшон ҳидоят менамоянд. Ба ҷои оне, ки бархе аз ҷавонон даст ба корҳои ношоям, аз қабили тамокукашӣ зананд, бояд илм омӯхта, соҳибкасбу соҳибдониш гарданду дар рушди кишвар саҳм гиранд. Зеро ояндаи дурахшони ин меҳан аз ҷавонони бедордили ин миллат вобастагии калон дорад.

Шароити мусоид ва ғамхориҳои пайвастаи давлату Ҳукумат ба соҳаи маориф ба он водор месозад, ки наврасонро дар рӯҳияи баланди ватандориву меҳандӯстӣ тарбия намоем. Барои сохтани ояндаи худ ва номдории ин марзу бум ҳидоят созем. Мутмаинем, ки ҷавонон ҳамеша барои рушду субот ва ободии Ватани азизамон, ҳамчун мутахассисони варзида талош мекунанду кишварамонро дар арсаи ҷаҳонӣ муаррифӣ менамоянд. 

 

Ҷамолбӣ ШАРИФОВА, 

омӯзгори МТМУ №43, ноҳияи Сино