- Ҳукумати кишвар дар ҳоле барои эмкунии шаҳрвандон алайҳи COVID - 19   қарор қабул намуд, ки аз оғози моҳи январ ҳолати сироятёбӣ ба ин беморӣ мушоҳида нашудааст. Пас, зарурати эмкунии шаҳравандон дар чист? 

- Дуруст аст, ки имрӯз Тоҷикистон бе COVID - 19  аст. Аммо ин ҳаргиз чунин маъно надорад, ки нисбат ба худ ва атрофиён бепарвоӣ зоҳир намоем, хусусан дар ҳоле ки ҷаҳон ҳанӯз аз ин беморӣ азият мекашад. 

- Яъне, то ҳол хавфи мубталошавӣ ба вируси нав вуҷуд дорад?

- Бале. Вале олимони соҳа дар пайи омӯзишу таҳқиқ собит намуданд, ки бемории сироятии COVID - 19  идорашаванда аст ва онро тавассути эмкунии оммавӣ  метавон идора намуда,аз байн бурд. Озмоишҳои дар ин самт анҷомёфта аз он гувоҳӣ медиҳанд, ки дар натиҷаи эмкунӣ масунияти бадани инсон баланд гардида, хавфи сироятёбӣ аз байн меравад. Яъне, дар инсон потан (антитела) пайдо мешавад. Ин яке аз роҳҳои асосии пешгирии хуруҷи бемории COVID - 19  мебошад. Ба ин хотир ва барои  барқарор намудани рӯзгори муътадили пешин дар соири кишварҳо эмкунии оммавӣ оғоз гардид, ки то имрӯз дар ҷаҳон беш аз 382 миллион нафар  алайҳи COVID - 19  иммунизатсия шудаанд. Ҳукумати кишвари мо низ дар аввалин имкон позаҳри COVID - 19 - ро дастрас намуд, то шаҳрвандон алайҳи ин беморӣ иммунизатсия шаванд. Ба ин мақсад, дар тамоми марказҳои саломатӣ ва тиббии кишвар беш аз 339 нуқтаи  эмгузаронӣ омода намудем. Дар назди ин нуқтаҳо, ҳамчунин, 4200 бригадаи доимоамалкунанда ташкил шуд. Онҳо шаҳрвандонро пеш аз иммунизатсия ташхис намуда, фишори хун, собиқаи бемориашонро ҳатман меомӯзанд. 

- Охири соли гузашта дар иддае аз кишварҳои ҷаҳон шаш ваксина аз озмоиш гузашту иҷозати истифода гирифт. Ниёзи ҷумҳурии моро ба ваксинаи COVID – 19 кадом ширкат таъмин намуд?

- Кишвари мо дар доираи механизми COVAX ба ваксина таъмин шуд. Албатта, бо ташаббуси Ҳукумати Ҷумҳурии Тоҷикистон ва дастгирии шарикон оид ба рушд. COVAX механизме мебошад, ки бо ибтикори Созмони ҷаҳонии тандурустӣ рӯи кор омадааст, то кишварҳои олам тавассути тақсимоти одилона ба он дастрасӣ дошта бошанд. Тоҷикистон дар доираи ҳамин механизм бояд, ки  ба 624 000 вояи ваксинаи  ширкати британиягии Оксфорд «AstraZeneca»  таъмин гардад. Аз ин шумор 192 000 вояи ваксина тавассути парвози махсуси тайёраи ширкати «Сомон – Эйр» аз Деҳлӣ ба кишвар  ворид гардид. Бақияи ваксинаҳо марҳила ба марҳила аз Ҳиндустон ба Тоҷикистон интиқол мешаванд. «AstraZeneca» тибқи иҷозат дар Пажӯҳишгоҳи зардобаҳои  Ҳиндустон (Srum Institute India) истеҳсол ва 15 феврали соли равон ба номгӯи маводи иммунобиологии дар ҳолати фавқулода истифодабарандаи Созмони ҷаҳонии тандурустӣ ба қайд гирифта шудааст. 

- Эмкунии шаҳрвандон ройгон аст?

- Бале.

- Аз рӯи нақша чанд дарсади аҳолӣ бояд, ки иммунизатсия шаванд? 

- Тибқи нақшаи миллии иммунизатсия, ки аз ҷониби Ҳукумати кишвар ва вазорату сохторҳои дахлдор тасдиқ шудааст, дар маҷмӯъ, марҳила ба марҳила эмкунии 62, 5 дарсади аҳолии синни аз 18 боло дар назар аст. Мувофиқи нақша онро дар асоси принсипҳои ихтиёрӣ аввал гурӯҳҳои осебпазири аҳолӣ - кормандони соҳаи тиб, омӯзгорон, кормандони соҳаи хизматрасонӣ, шахсони гирифтори бемориҳои музмини ғайрисироятӣ, ҳамчунин, нафарони аз 60 - сола боло хоҳанд гирифт. Аз рӯи нақшаи муайяншуда то ин дам аслан кормандони соҳаи тибби пойтахт ба иммунизатсия фаро гирифта шуданд. Ҳоло кор дар ин самт бо суръат ҷараён дорад. Баъди иммунизатсия гурӯҳҳои осебпазири пойтахти кишвар, аҳолии шаҳру навоҳӣ ба эмкунӣ фаро гирифта мешаванд.

Тибқи дастурамали воя ҳар нафар бояд, ки 2 маротиба аз эмкунӣ гузарад. Фосилаи байни эмкунӣ аз 8  то 12 ҳафтаро дар бар мегирад. Дар ҳолати маротибаи дуюм иммунизатсия нашудан, масунияти одам метавонд, дигарбора паст гардад. 

Кӯшишҳое, ки Ҳукумати кишвар дар якҷоягӣ бо кормандони соҳаи тиб дар ин самт анҷом медиҳанд, ба хотири зиндагии шоистаи мардум аст. Умед дорем бо ин роҳ хуруҷи  бемориро, ки ҳанӯз хавфи сироятёбиаш вуҷуд дорад, пешгирӣ намоем. 

 

Фарзона ФАЙЗАЛӢ, «Ҷумҳурият»