Гулнисо Холова, директори муассиса, дар суҳбат ба хабарнигори рӯзномаи «Ҷумҳурият», гуфт: «Бинои навбунёд дар заминаи дастуру ҳидоятҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз ҷониби соҳибкори маҳаллӣ Саидмурод Саъдуллоев ва фарзандони ӯ бо тарҳи зебову замонавӣ қомат афрохта, бо шароити мусоиди таълим таъмин шуд. Иншооти ҷашнӣ дуошёна буда, дорои 10 синфхона, аз ҷумла синфхонаи компютерӣ бо тахтаи электронӣ ва дигар таҷҳизоти таълимӣ мебошад. Ҳамзамон, саҳни муассисаро беш аз 500 бех дарахти ороишиву сояафкан, 22 ҳазор гулу буттаҳои рангоранг ва сабзазор зеб медиҳанд. Чароғакҳои равшанидиҳанда, роҳравҳои асфалту сафолакпӯш ва панҷараҳои оҳанин аз корҳои дигари ободонӣ дар муассиса ба шумор мераванд. Муассиса бо системаи гармидиҳӣ таъмин мебошад. Инчунин, чанде пеш аз ҷониби соҳибкорони деҳа китобхона ва ошхонаи муассиса низ бо сифати баланд бунёд гардида, синфхонаҳои боқимонда низ аз  таъмири асосӣ бароварда шуд». 

Иттилоъ дода шуд, ки айни замон дар муассиса 476 хонанда дар ду баст таҳсил мекунад. Акнун бо ба истифода додани бинои иловагӣ имкон пайдо шуд, ки муассиса беш аз 600 хонандаро дар ду баст ба таълиму тарбия фаро гирад. 

Сохтмони иншоот соли 2019 оғоз ёфта, зимни бунёди он беш аз 50 сокини маҳаллӣ ва устои моҳир аз вилояти Суғд бо ҷои кори муваққатӣ ва маоши хуб таъмин буд. Дар рафти сохтмон аз масолеҳи сохтмонии ватании хушсифат истифода шуд. Илова бар ин, бо саҳми соҳибкорон ва шахсони саховатпеша аз даромадгоҳи деҳаи Пушкин то муассисаи таълимии мазкур, ки масофаи 2,5 километрро ташкил медиҳад, асфалтпӯш гардид. 

Меҳмонон зимни шиносоӣ бо шароити таълим дар бинои нав ба корҳои сохтмонӣ баҳои баланд дода,  ба Саидмурод  Саъдуллоев  ва  дигар шахсоне, ки дар ин кор саҳм гузоштаанд барои дастгирӣ аз сиёсати маорифпарваронаи Пешвои миллат муҳтарам Эмомалӣ Раҳмон миннатдорӣ баён карда, бинои нави таълимиро туҳфа дар рӯзҳои таҷлили Ҷашни Наврӯз ва 30 - солагии Истиқлолияти давлатӣ арзёбӣ намуданд. 

Дар ин рӯз, ҳамчунин, бо дастгирии соҳибкорони маҳаллӣ ва шахсони саховатпеша дар Ҷамоати деҳоти Ҳалевард 4 синфхонаи иловагӣ дар назди муассисаи таҳсилоти миёнаи умумии № 4 ба истифода дода шуд. Бо бунёди синфхонаҳои иловагӣ шароити таълим дар муассиса беҳтар гашт.