Ба гуфтаи Тоҷиддин Давлатзода, директори КФД “Ниҳолпарварӣ ва кабудизоркунӣ”-и шаҳр, айни замон дар корхона 58 нафар фаъолият дорад. Он дорои 8 техника буда, ҳамарӯза ва сари вақт корҳои истеҳсолию хоҷагидориро амалӣ менамоянд.

- Баҳри иҷрои дастуру супоришҳои Пешвои муаззами миллат муҳтарам Эмомалӣ Раҳмон оид ба корҳои ободонию созандагӣ, аз тарафи мақомоти иҷроияи ҳокимияти давлатии вилоят ва шаҳри Бохтар ба ифтихори Ҷашни 30-солагии Истиқлоли давлатии Ҷумҳурии Тоҷикистон бинои корхонаи мазкур мавриди баҳрабардорӣ қарор гирифт, - мегӯяд Т. Давлатзода. - Маблағи лоиҳавии сохтмон 376 ҳазор сомониро ташкил дод.

Масоҳати корхона ду гектар буда, 1,5 гектарашро заминҳои корам фаро мегирад. Дар заминҳои муассиса зиёда аз 600 бех дарахти ҳамешасабз, аз қабили туя, сӯзанбарг, можжевелник (як намуди арча) ва сарв (кипарис), парвариш мешаванд, ки дар ҳолати хуби нашъунамоанд. Ҳамчунин, корхона дорои 5 гармхона бо масоҳати 1600 метри мураббаъ мебошад, ки дар онҳо 16 намуд гулҳои гуногуни мавсимию бисёрсола нигоҳубин мегарданд. 

Баҳори соли ҷорӣ дар кӯчаю хиёбонҳо ва гулгашту майдонҳои шаҳр 140 ҳазор бех гулҳои гуногуни мавсимӣ ва 501 ҳазор бех лолаи навъи F1 ва F2 шинонда шуд. Дар маъракаи ниҳолшинонӣ бошад, аз тарафи корхона дар шаҳр зиёда аз 600 бех дарахтони сояафкан, ороишӣ ва ҳамешасабз ба монанди туя, сӯзанбарг, можжевелник, шоҳбулут, сирена, инчунин, аз ҳисоби истеҳсоли худии корхона зиёда аз 31 ҳазор бех намудҳои гуногуни садбарг шинонда шуданд.

Мавриди зикр аст, ки аз соли таъсисёбӣ то инҷониб корхонаи фаръии давлатии “Ниҳолпарварӣ ва кабудизоркунӣ”-и шаҳри Бохтар бинои маъмурӣ надошт ва  кормандони он дар вагонҳо фаъолият менамуданд. Акнун, бо фароҳамоварии шароити муносиби корӣ аҳли заҳмати корхона фаъолияташонро вусъат дода, баҳри боз ҳам хуррамгардонии кӯчаву хиёбонҳои маркази маъмурии вилояти Хатлон саҳм хоҳанд гузошт.