Музаффар Юнусов, мудири шуъбаи иттилоотию таҳлилии дастгоҳи раиси вилояти Суғд, ба «Ҷумҳурият» гуфт, ки ба муносибати ин ҷашни бузург дар ҳудуди ҷамоат бунёду навсозии беш аз 40 иншооти муҳими иҷтимоӣ ба нақша гирифта шуда, бо маблағгузории Ҳукумати ҷумҳурӣ, мақомоти иҷроияи ҳокимияти давлатии вилояту шаҳр ва саҳмгузории соҳибкорону саховатмандон то имрӯз беш аз 30 иншооти гуногун мавриди истифода қарор гирифт.

Иттилоъ дода шуд, Раҷаббой Аҳмадзода, раиси вилоят ба шаҳри Исфара сафари корӣ анҷом дода, дар Ҷамоати деҳоти Ворух бо рафти бунёди майдони Парчами давлатӣ, муассисаи нави таълимӣ, қасри фарҳанг, обод намудани мавзеъҳои ҷамъиятӣ, роҳу кӯча ва маҳали зист, сабзкориву хуррамгардонӣ шинос гардида, ба меҳнатдӯстии сокинон баҳои баланд дод.

Сокинони шарафманди Ворух бо ҳисси баланди ифтихори миллӣ ва ҷонибдорӣ аз сиёсати хирадмандонаи Пешвои миллат муҳтарам  Эмомалӣ Раҳмон баҳри амалӣ гардондани дастуру ҳидоятҳояшон ҳамаи чораҳоро меандешанд ва бо саҳмгузорӣ дар ободонии Тоҷикистони азизамон баҳри истиқболи сазовори ҷашнҳои дарпешистода талош доранд.

Чуноне иттилоъ доданд, ба нақшаи чорабиниҳои мақомоти иҷроияи ҳокимияти давлатии шаҳр оид ба омодагӣ ба Ҷашни 30 - солагии Истиқлолияти давлатӣ 457 лоиҳа ворид гардида, маблағи умумии он 922 миллиону 968 ҳазор сомонӣ мебошад. Дар шаҳр соли 2018 - 95 иншоот, 2019 - 149, 2020 - 161 ва дар ду моҳи соли равон 4 иншооти ҷашнӣ сохта, ба истифода дода шуд.

Мақомоти иҷроияи ҳокимияти давлатӣ ва меҳнаткашони шаҳр бо ҷонибдорӣ аз сиёсати ояндасози Пешвои миллат, Президенти кишвар муҳтарам Эмомалӣ Раҳмон тамоми имкониятҳои мавҷударо барои рушди соҳаҳои иқтисодиву иҷтимоии шаҳр, ободу зебо гардондани диёр ва беҳбудии сатҳи зиндагии мардум сафарбар намуда, ҷиҳати бо дастовардҳои назаррас пешвоз гирифтани Ҷашни 30 - солагии Истиқлолияти давлатӣ аз тамоми имконияту захираҳо истифода бурда истодаанд.