Донишгоҳи давлатии тиббии Хатлон бо назардошти афзоиши аҳолии мамлакат ва қонеъ намудани талаботи кишвар ба мутахассисони соҳаи тиб, бо ташаббуси Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таъсис ёфта, соли панҷум аст, ки фаъолият дорад. Бояд махсус зикр намуд, ки дар таърихи Тоҷикистони  соҳибистиқлол ин дуюмин муассисаи олии касбии тиббӣ ба ҳисоб меравад.

 

Тавре  Убайдулло Қурбон, ректори донишгоҳ, ба хабарнигори «Ҷумҳурият» иттилоъ дод, дастовардҳои донишгоҳ дар соли 2020 дар сатҳи хеле баланд арзёбӣ мегардад. Боиси қаноатмандист, ки дар донишгоҳ 701 нафар донишҷӯ ё 48,4 дарсади он бо баҳои хубу аъло таҳсил мекунад. Чунин нишондиҳанда дар байни донишгоҳҳои кишвар баландтарин ба ҳисоб меравад. Бо сарфарозӣ метавон гуфт, ки баланд бардоштани сатҳу сифати таълими донишҷӯён ва беҳтар намудани дараҷаи омодагии касбии мутахассисони ҷавони тиб ҳамеша дар маркази диққат қарор дорад. Дар донишгоҳ нахустин Конференсияи байналмилалии илмӣ – амалӣ дар мавзӯи масъалаҳои мубрами тиб ва таҳсилоти тиббӣ, бо иштироки васеи олимони ватанӣ ва кишварҳои хориҷӣ баргузор шуд. Инчунин, дар сохтори донишгоҳ маркази таҳсилоти баъд аз дипломӣ ташкил гардида, дар давоми як сол 10 барномаи бозомӯзии касбӣ, 13 барномаи ординатураи клиникӣ ва 40 барномаи такмили ихтисос таҳия шуда, ҳамзамон, 43 нафар аз устодону омӯзгорони донишгоҳ аз курсҳои такмили ихтисос гузашта, соҳиби шаҳодатнома гардиданд. Соли сипаришуда дармонгоҳи донишҷӯён таъсис ёфт, ки он ба пуррагӣ ба фаъолият шурӯъ намуд. Шароити мусоиди таълиму тарбия замина фароҳам овард, то дар соли 2020 – ум аз шумули донишҷӯён 6 нафар бо стипендияи Президенти Ҷумҳурии Тоҷикистон, 3 нафар стипендияи раиси вилояти Хатлон, 1 нафар бо стипендияи Кумитаи ҷавонон ва варзиш, 2 нафар бо стипендияи Ҳизби Халқии Демократии Тоҷикистон, 2 нафар бо стипендияи Кумитаи ҷумҳуриявии иттифоқи касабаи тандурустӣ ва ҳифзи иҷтимоии аҳолии Ҷумҳурии Тоҷикистон мушарраф гаштаанд. Барои донишгоҳи давлатии тиббии Хатлон боиси ифтихору қаноатмандист, ки соли 2020 бори аввал дар донишгоҳ тадриси 10 фанни нави таълимӣ ба роҳ монда шуд. Бори аввал дар сохтори доиншгоҳ 2 кафедраи нав, фанҳои муолиҷавии № 2, фанҳои ҷарроҳии № 2 таъсис дода шуда, ба фаъолият шурӯъ намуданд.

Кормандони донишгоҳ дар баробари фаъолияти омӯзгорӣ, боз ба корҳои машваратӣ, методӣ, ташхисӣ ва табобатӣ машғуланд, ки онҳо дар давоми соли рафта 7 ҳазору 563 нафар беморро ташхис ва табобат намудаанд. Аз ҷониби кормандони донишгоҳ дар пойгоҳи беморхонаи ҷумҳуриявии клиникии ноҳияи Данғара 14 амалиёти трансплантологияи гурдаю ҷигар, 210 амалиёти ҷарроҳии пластикӣ ва реконструктивӣ гузаронидаанд. Дар маҷмӯъ, 408 амалиёти ҷарроҳӣ аз рӯи беш аз 60 намуд гузаронда шудааст. Ҳамзамон, дар давраи пандемияи COVID – 19 гурӯҳи волонтёрон ташкил карда шуд, ки онҳо дар ҳамкори бо КАТС-и ноҳияи Данғара, дар маҷмӯъ, 6 ҳазору 235 хонаро гардиш намуда, вазъи саломатии тақрибан 30 ҳазор шаҳрвандро муайян намуданд. Аз шумори кормандони донишгоҳ 25 нафар дар мубориза бар зидди ин бемории сироятӣ бевосита саҳм гирифтанд. Умуман, ҷиҳати ба стандартҳои байналмилалӣ мувофиқ намудани дараҷаи омодасозии мутахассисони ҷавони тиб, шароиту имкониятҳои нав дар донишгоҳи навтаъсис муҳайё гардида истодаанд. Роҳбарият ва устодони Донишгоҳи давлатии тиббии Хатлон ҷиҳати омодасозии мутахассисон ба талаботи замони муосир ҷавобгӯи соҳаи тиб, тамоми имконияту воситаҳоро ба кор мебаранд.

 

Холназар КАСИРОВ,

«Ҷумҳурият»