Дар ноҳияи Рашт ба масъалаи соҳибкасб намудани шаҳрвандони бешуғл, аз ҷумла занон, таваҷҷуҳи ҳамешагӣ зоҳир мешавад. Бо ин мақсад, дар шаҳраки Ғарм филиали Муассисаи давлатии “Маркази калонсолони Тоҷикистон” дар ноҳияи Рашт  таъсис ёфт.

 

Тавре Наҷибулло Ғиёсов, директори филиали мазкур, зимни суҳбат бо хабарнигори рӯзнома иттилоъ дод, он аз рӯи 14 ихтисос касбомӯзонро фаро гирифтааст.

Тайи як соли охир ба касбомӯзӣ, такмили ихтисос ва шаҳодатномакунонии малакаҳои касбии шаҳрвандон, хусусан муҳоҷирони меҳнатӣ дар Маркази таълими калонсолони Тоҷикистон дар ноҳияи Рашт, аз ҳисоби курсҳои мусоидат ба шуғли аҳолӣ 7 гурӯҳ бо теъдоди 105 нафар, аз ҳисоби курсҳои худмаблағгузор 7 гурӯҳ бо теъдоди 81 нафар ва аз ҳисоби шаҳодатномакунонии малакаи касбӣ 148 нафар, дар маҷмӯъ, 334 нафар ба касбомӯзӣ фаро гирифта шуд, ки аз ин шумора 116 нафарашро занон ташкил медиҳанд.

Боиси ифтихор ва сарфарозии кормандони сохторҳои тобеи Вазорати меҳнат, муҳоҷират ва шуғли аҳолӣ дар ноҳияи Рашт мебошад, ки соли 2019 дар рӯзи Ҷашни Ваҳдати миллӣ бинои наву замонавӣ бо иштироки Пешвои муаззами миллат муҳтарам Эмомалӣ Раҳмон ба истифода дода шуд.

Аз ҷумла, филиали Маркази таълими калонсолони Тоҷикистон дар ноҳияи Рашт дар он ҷойгир аст ва он дорои 8 синфхонаи тахассусӣ буда, бо таҷҳизоти зарурии таълимию омӯзишӣ таъмин мебошад, ки ин шароити мусоиди кору фаъолиятро барои кормандони филиал фароҳам меорад.

- Роҳбарияти филиали Маркази таълими калонсолони Тоҷикистон дар ноҳияи Рашт туфайли ғамхориҳои пайвастаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон саъю талош меварзад, ки дар ҷодаи соҳибкасб намудани шаҳрвандони бешуғли ноҳия, аз ҷумла занон, тамоми имкониятҳои дар даст доштаашро равона созад, - гуфт Н. Ғиёсов.

 

Худодод ЗАЙНИДДИН, “Ҷумҳурият”