Муайян гардид, ки бо қарори судяи суди шаҳри Хуҷанд аз 27 августи соли 2020 ба Саидҷон Ваҳобзода, мудири шуъбаи молиявию хоҷагидории дастгоҳи раиси вилояти Суғд, бо моддаи 481 қисми 1 Кодекси ҳуқуқвайронкунии маъмурии Ҷумҳурии Тоҷикистон (риоя накардани талаботи қонунгузорӣ дар бораи танзими анъана ва ҷашну маросим) ҷазои ҷарима ба андозаи 500 нишондиҳанда барои ҳисобҳо (29000 сомонӣ) таъйин шудааст.

Дар ҳақиқат С. Ваҳобзода рӯзи 14 августи соли 2020 дар манзили истиқоматиаш, воқеъ дар шаҳри Хуҷанд, маҳаллаи 28, қитъаи 9, бархилофи талаботи банди 2 - и моддаи 10 - и қонун «Дар бораи танзими анъана ва ҷашну маросим дар Ҷумҳурии Тоҷикистон» амал намуда, бо иштироки зиёда аз 30 нафар маъракаи сандуқбарон ва муборакбодиро, ки тибқи қонунгузорӣ гузарондани он манъ аст, баргузор намуда, муборакбодии меҳмононро қабул карда, сарулибоси арӯсро ба хонаи домодшаванда фиристодааст.

Бо қарори раёсати суди вилояти Суғд аз 10 декабри соли 2020 ҷазои ҷаримаи таъйиннамудаи суди марҳилаи якум ба андозаи то 100 нишондиҳанда барои ҳисобҳо (5800 сомонӣ) кам карда шудааст, ки дар мақола ҳамин масъала мавриди нигаронӣ қарор гирифтааст. Вале, бояд қайд намуд, ки тибқи талаботи қисми 2 - и моддаи 48 Кодекси ҳуқуқвайронкунии маъмурӣ ҳангоми таъйини ҷазои маъмурӣ хусусияти ҳуқуқвайронкунии маъмурии содирнамудаи шахси гунаҳкор, вазъи молумулкиаш, ҳолатҳои сабуккунанда ва вазнинкунандаи ҷавобгарии маъмурӣ ба инобат гирифта мешавад.

Мувофиқи талаботи қисми 5 моддаи номбурда ҳангоми мавҷуд будани ҳолатҳои истисно, бо назардошти маълумот дар бораи шахси гунаҳкор, инчунин, вазъи молу мулкии ӯ, суд метавонад аз ҳадди ақалли қонун ҷазои маъмурии пасттарро таъйин намояд. Дар ҳамин асос раёсати суди вилояти Суғд шахсияти гунаҳгор С. Ваҳобзодаро, ки бори аввал ҳуқуқвайронкунии маъмурӣ содир кардааст, ягона таъминкунандаи рӯзгори оилааш мебошад, аз ҷойи истиқоматиаш хислатномаи мусбӣ дорад, ҳамчун ҳолатҳои мустасноӣ эътироф карда, ҷазои таъйиннамудаи суди марҳилаи якумро то 100 нишондиҳанда барои ҳисобҳо (5800 сомонӣ) кам кардааст, ки мухолифи қонун нест.

 

Ш. ЛУТФУЛЛОЗОДА, муовини якуми раиси Суди Олӣ