Хушоянд аст, ки дар ҷодаи таъмини тандурустии мардум, дар назди дармонгоҳҳо ва марказҳои саломатӣ шуъбаҳои тибби оилавӣ амал мекунанд. Фаъолияти ин шуъбаҳо, ки дар асоси ислоҳоти соҳаи тандурустӣ роҳандозӣ шудааст, рӯз ба рӯз вусъат пайдо мекунад. Аз ин ҷост, ки хизматрасонии духтурони оилавӣ бештару пурсамар ба назар мерасад. Барои рушду пешравии самти мазкур Барномаи давлатии рушди тибби оилавӣ барои солҳои 2011 - 2015 ҳам қабул гардида, мавриди амал қарор гирифт ва тадбирҳои зиёд, аз қабили сифатан беҳтар намудани хизматрасонии тиббӣ, пешгирии саривақтии бемориҳо, ташхис ва табобати беморон амалӣ мешаванд.

Роҳандозӣ гардидани хизматрасонии тибби оилавӣ дар шароити феълӣ иқдоми муҳиму саривақтӣ буда, аз дигар намуди хизматрасониҳои тиббӣ афзалият ва бартарӣ дорад.

Имрӯз шумораи мутахассисони ин намуди хизматрасонии тиббӣ - духтурони оилавӣ ва ҳамшираҳои шафқат афзуда, онҳо вобаста ба шароит дар маҳали зисти сокинон фаъолият мекунанд. Ба ҳар фард дар алоҳидагӣ, ба оила, аҳолии минтақа, инчунин, дар хона, новобаста аз ҷинс, синну сол ва намуди беморӣ, ёрии аввалини тиббиву санитарӣ расонда мешавад.

Тибби оилавӣ дар беҳдошти сиҳатии мардум нақши муҳим мебозад ва табибони оилавӣ ҳамрозу ҳамнавои мардум мебошанд. Умед аст, ки оянда сафи мутахассисони соҳа меафзояд ва ин падида ҳам барои рафъи мушкили норасоии кадрҳои соҳа ва ҳам барои дастрасии сокинон ба намудҳои гуногуни хизматрасонии тиббию санитарӣ дар минтақаҳо, бахусус гӯшаҳои дурдаст, мусоидат мекунад.

«Обрӯву эътибори табиб на танҳо ба донишу малака, балки ба одобу ахлоқи ӯ низ вобаста аст». Ин гуфтаи пурҳикмати Шайхурраис Ибни Сино айни муддаост. Зеро ба беморон, бавижа барои хонаводаҳое, ки ин ё он пайвандашон бемор аст, табиби оилавӣ болу пар мебошад. Муоширати хуб ва ҳарфи нарми табиб умед мебахшад, то бемор ба оянда бо дилу дидаи гарм нигаҳ кунад. Ин аст, ки аз мо, табибон дар баробари донишу малакаи хуби касбӣ, пеш аз ҳама, одобу рафтори нек чашмдоранд. 

 

Фароғат МАЛЛАЕВА, 

табиби оилавии Муассисаи давлатии 

«Маркази саломатии шаҳрии №1», шаҳри Душанбе