Коршиноси Маркази тадқиқоти стратегии назди Президенти Ҷумҳурии Тоҷикистон Алиназар Ашуров ин вазъро таҳлил карда, чунин менигорад: 

- Набарди ҳарбӣ дар сарҳади Тоҷикистону Қирғизистон ба анҷом расид, вале ҷанги иттилоотӣ дар фазои маҷозӣ бо суръат давом дорад. Мушоҳида мешавад, ки расонаҳои хабарӣ ва ҷомеаи шаҳрвандии Қирғизистон дар фазои иттилоотӣ хабарҳои ғалат ва якҷонибаро паҳн менамоянд. Нодуруст инъикос намудани маълумот ва раванд аз ҷониби кишвари ҳамсоя нигаронкунанда аст. Ҳамбастагӣ, эътимод ва инъикоси воқеии раванди Ворух дар фазои иттилоотии Тоҷикистон аз ҷониби Ҳукумати кишвар, расонаҳои хабарӣ ва коршиносон устувории ҷониби моро дар фазои иттилоотӣ таъмин намуда истодааст.

Дар робита ба ин, Иттифоқи журналистони Тоҷикистон бо нашри муроҷиатнома аз  рӯзноманигорон ва фаъолони шабакаҳои иҷтимоӣ хоҳиш кардааст, то ҳаводиси дар марз рухдодаро баинсофона ва бо далелу рақамҳои таҳрифношуда барои муштариён  пешниҳод намоянд: “Ҳанӯз дар даврони Иттиҳоди Шӯравӣ нобаробарии иҷтимоӣ ва тақсими захираҳои обӣ ба моҷарои марзӣ оварда расонда буд. Вале ба ин даргириҳо ва баҳсҳо нуқтаи охир нагузоштанд. Даргириҳо ва талошҳои марзӣ ҳодисаи нав нест, аммо ҳадафи аслии мо бояд инъикоси воқеъбинонаи ин масъалаи ниҳоят доғ бошад. Мутаассифона, чи дар расонаҳои чопиву электронӣ ва чи дар шабакаҳои иҷтимоӣ дар мавриди вазъ иттилои хушунатомез, пур аз эҳсосот ва кинаву адоват пахшу паҳн мегарданд.

Мо, журналистон дар чунин вазъ бояд ба эҳсосот дода нашавем, балки ҳамаи масоилро дар тарозуи адлу инсоф баркашида, сабаби домана задани алангаи нафрату оштинопазирӣ набошем”.

Коршиносон бар он назаранд, ки  эҳтимол дорад аз хабару гузоришҳои ғалати Қирғизистон ҷомеаи ҷаҳонӣ бардошти нодуруст гирад. Аз ҳамин лиҳоз, барои воситаҳои ахбори оммаи кишвари мо зарур аст, ки ба забонҳои хориҷӣ ва ба таври васеъ мавқеи Тоҷикистонро баён намоянд. Ҳамчунин, нашри бештари маводҳои таҳқиқотии журналистӣ дар мавриди ҳамлаҳои қаблии ҷониби Қирғизистон ба сокинони Ворух зарур аст, зеро тӯли сӣ соли мустақилии кишварҳо соле набудааст, ки ҷониби Қирғизистон дар марз мушкилотеро ба миён наоварда бошад. Ин имкон медиҳад, ки ҷомеаи ҷаҳонӣ  аз ҳолати воқеии дар марз рухдода огоҳ шавад. 

Дар бораи муносиботи ду кишвар Бахтиёр Қутбиддинов, устоди факултети журналистикаи ДМТ, чунин гуфт: 

 - Миёни тоҷикону ӯзбекон солҳои зиёд ноҳамворӣ вуҷуд дошт ва ба шарофати хирадмандии роҳбарони ҳар ду ҷониб Эмомалӣ Раҳмон ва Шавкат Мирзиёв  ин мушкил ҳалли худро ёфт. Ин баҳамоии онҳо барои ҳар ду миллат манфиат овард. Умед дорем, ки миёни тоҷикону қирғизҳо низ муносибатҳо хуб мешаванд. Роҳбарони ҳар ду ҷониб қадамҳои аввали худро дар мавриди баҳамоӣ гузоштанд ва умед дорем, ки даргириҳои дар марз бавуқӯъомада ҳаргиз такрор намешаванд.

 

Нигина РАҲМОН, «Ҷумҳурият»