Изҳороти расмии Прокуратураи генералии Ҷумҳурии Тоҷикистон дар робита ба ин қизия метавонад ҳамчун далели воқеӣ ба кор гирифта шавад. Дар баёния омадааст: «29 апрел, тақрибан соати 11 гурӯҳи химатчиёни ҳарбӣ ва сокинони Ҷумҳурии Қирғизистон дар рӯбарӯи дидбонгоҳи сарҳадии №2-и «Хоҷаи Аъло»-и қисми ҳарбии Қӯшунҳои сарҳадии Кумитаи давлатии амнияти миллии Ҷумҳурии Тоҷикистон дар вилояти Суғд, воқеъ дар болои дарёи Исфара ва ҳудуди деҳаи Хоҷаи Аълои Ҷамоати деҳоти Чоркӯҳи шаҳри Исфара, ҷамъ омада, монеи насби камераҳои мушоҳидавӣ дар назди сарбанди обтақсимкунии «Головной» аз ҷониби муҳандисони тоҷик шуданд. Ин дар ҳолест, ки барои насби камера ё дурбинҳои мушоҳидавӣ қаблан мувофиқа ҳосил шудааст. Дар идомаи бетартибиҳо бо истифодаи силоҳи оташфишон ва техникаи ҳарбӣ якчанд нафар кушта, даҳҳо тан захмӣ  ва шумораи зиёди хонаҳои истиқоматӣ, иншооти сарҳадӣ ва объектҳо оташ зада шуданд». 

Бо нашри ин гузориши асоснок Прокуратураи генералии Ҷумҳурии Тоҷикистон дар робита ба муноқишаи марзӣ бо дастрасии моддаи 395 қисми 2 ва моддаи 104 қисми 2 Кодекси ҷиноятии Ҷумҳурии Тоҷикистон аз оғози парвандаи ҷиноятӣ нисбат ба гурӯҳи хизматчиёни ҳарбӣ ва шаҳрвандони Ҷумҳурии Қирғизистон хабар дод, ки ин амр дар асоси қавонини байналмилалист.

Ҷумҳурии Тоҷикистон дар гузашта нисбат ба амалҳои аҳдшиканонаву ғайриқонунии ҷониби ҳамсоякишвар, ба хотири ҳифзи оромӣ ва пешгирӣ аз ҳар гуна ташаннуҷи вазъ, таҳаммул нишон медод. Вале ҳамин таҳаммулпазирии давлат ва миллати сулҳпарвари тоҷик гӯё дасисасозони кишвари ҳамсояро далер кард, ки ин бор сӯи мардуми осоишта ва мақомоти расмӣ, дар шахси раиси шаҳри Исфара, ки барои музокира ба маҳали баҳс омада буд, ҳамлаи мусаллаҳона анҷом доданд. Танҳо баъд аз он ки дигар ҳеҷ гузинае барои ором кардани шӯришчиёни қирғиз коромад нашуд, неруҳои низомии Тоҷикистон маҷбур шуданд, ки аз таҳоҷум ба марзи давлатии худ ҳимоят кунанд. 

Таърих гувоҳ аст, ки мардуми тоҷик тӯли таърихи беш аз ҳазорсолаи худ ҳаргиз ба кишваре ҳуҷум накардааст. Тоҷикистон дар оини ҳамсоядорӣ ҳамоно содиқ буда, ҳамеша талош бар он дорад, ки бо мамлакатҳои ҳамҷавор, аз ҷумла Қирғизистон, муносиботи неку ҳасана дошта бошад, зеро миллати фарҳангпарвару тамаддунофари тоҷик медонад, ки дӯстиву рафоқат ва ҳамдиливу ҳамдигарфаҳмӣ асоси шукуфоиҳост.

 

Ш. ҚУРБОН, «Ҷумҳурият»