Ба ҳамагон маълум аст, ки соли 2020 бо паҳншавии вируси сироятии COVID - 19 назар ба дигар солҳо фарқкунанда буд. Ва ҷомеаи ҷаҳонӣ кӯшиш кард, ки иқтисодиёташон дар вазъияти буҳрони ҳамагир муфлис нагардад. Бо вуҷуди ин, соли сипаришуда иқтисодиёти қисме аз давлатҳо дар фишанги пандемияи ҷаҳонӣ рӯ ба коҳишёбӣ овард.

Ҷумҳурии Тоҷикистон чун узви комилҳуқуқи ҷомеаи ҷаҳонӣ аз ҳар пайомаде, ки ба мамолики дунё дахл дорад, ҷудо буда наметавонад. Аз ҷумла, дар Тоҷикистон низ вируси ҳамагир ба қайд гирифта шуд ва то андозае зарари худро дар рушди иқтисоди миллӣ расонд. Хушбахтона, давлати мо аз ҷумлаи он давлатҳое нагардид, ки ба буҳрон рӯ ба рӯ гардида, иқтисодиёташ рӯ ба коҳиш орад. Ҳарчанд баъзе соҳаҳо дар фаъолияти худ ба мушкилӣ дучор гардида бошанд ҳам, бо вуҷуди ин, сиёсати пешгирифтаи давлату Ҳукумати Тоҷикистон тавонист, ки роҳи муфлисшавии корхонаҳоро дар кишвар пешгирӣ намояд: «Яъне, мо соли 2020 дар вазъияти бошиддати иқтисодиву молиявии ҷаҳонӣ фаъолият карда, бо вуҷуди мушкилоти пешомада, ҷиҳати пешгирӣ намудани пайомадҳои буҳрон ва ҳифзи амнияти иқтисодии мамлакат як қатор чораҳои фавриро роҳандозӣ кардем», - изҳор доштанд Пешвои миллат.

Таъсири вируси COVID - 19- ро аз хурд то калон дар тамоми ҷаҳон эҳсос намуданд. Он ҷомеаи ҷаҳониро ба тарсу ваҳм дучор намуд ва ба бисёр соҳаҳо зарари худро расонд. Пеш аз ҳама коронавирус мушкилоти иқтисодиро дар ҷаҳон печидатар гардонд. 

Натиҷаи сиёсати дурбинона ва хирадмандонаи Роҳбари давлат муҳтарам Эмомалӣ Раҳмон дар давраи сахти буҳрони ҷаҳонӣ нишон дод, ки Ҷумҳурии Тоҷикистон метавонад, ҳатто дар замони ноамнӣ, хуруҷи бемориҳои мухталиф, пандемияҳо мувозинати иқтисодии худро нигоҳ дорад. Ҳатто соли 2020 бо вуҷуди паҳншавии бемории COVID-19 иқтисодиёти кишвар афзоиш ёфта, ҳаҷми маҷмӯи маҳсулоти дохилӣ боло рафт. 

Таъкидҳои Сарвари давлат дар Паёми хеш барои нигоҳ доштани иқтисодиёти кишвар ва боло бурдани сатҳи афзоиши он дар давраи сахту душвор роҳнамои тамоми ҷомеаи тоҷикистонӣ мебошад. Пешвои миллат дар робита ба ин, зикр карданд, ки беҳтар гардондани фазои сармоягузориву соҳибкорӣ ва ҷалби сармояи мустақим барои таъмини рушди устувори иқтисоди миллӣ яке аз самтҳои афзалиятноки сиёсати иқтисодии мо ба ҳисоб меравад.

Бо назардошти таъкидҳои Пешвои миллат, шиддат гирифтани рақобати тиҷоратӣ миёни кишварҳо моро вазифадор месозад, ки дар самти пешгирии хавфҳо ва коҳиш додани таъсири онҳо ба иқтисоди миллӣ, инчунин, баланд бардоштани рақобатнокии маҳсулоти истеҳсоли ватанӣ тадбирҳои зарурӣ андешем. Чун дар раванди босуръати ҷаҳонишавӣ соҳаи иқтисодиёти кишварҳо бетаъсир намонда, он аз ҳар давлат рақобати шадидро талаб мекунад.

Аз дидгоҳи Роҳбари давлат барои таъмини рушди устувори иқтисоди миллӣ, қабл аз ҳама, фаъолият дар самти муқовимат ба таҳдиду буҳронҳо, ташаккули имконияту захираҳои молиявии ба рушд нигарондашуда, таъмини гуногунсамтии иқтисодиёт, густариши раванди рақамикунонӣ, дастрасии молиявию дастгирии соҳибкорӣ, ҳалли масъалаҳои иҷтимоии аҳолии кишвар, омодагӣ ба пайомадҳои тағйирёбии иқлим ва гузариш ба иқтисоди «сабз» тақвияти бештар бояд бахшида шавад.

 

Лутфулло НАВРӮЗОВ, 

сардори раёсати корҳои дастгоҳи марказии

Кумитаи меъморӣ ва сохтмони назди Ҳукумати Ҷумҳурии Тоҷикистон