Ниёзӣ Кишваршоҳ Шомирзо, омӯзгори муассисаи таҳсилоти миёнаи умумии № 7, сокини Ҷамоати деҳоти Иван-тоҷики ноҳияи Кӯҳистони Мастчоҳ, дар мактубаш ба рӯзномаи “Ҷумҳурият” аз он изҳори нигаронӣ мекунад, ки дастури Пешвои миллат муҳтарам Эмомалӣ Раҳмон дар иртибот ба ҳаллу фасли масоили иҷтимоии мавсуф: ҷудо кардани қитъаи замину бо таври ҳашар бунёд кардани манзили зист, додани як сар гову гӯсола, чанд оилаи занбӯри асал ва оиладор кардан аз ҷониби мақомоти иҷроияи ҳокимияти давлатии вилояти Суғд ва ноҳияи Кӯҳистони Мастчоҳ, ки 20 августи соли 2019 дар мулоқот бо мардуми ноҳия шуда буд, бо гузашти наздик ду сол пурра иҷро намешавад. Аз марҳила ба марҳила иҷрошавии ин дастур ӯ қаноатманд нест ва бо исрор аз масъулони вилояту ноҳия талаб дорад, ки бояд барояш манзили замонавӣ созанду хонадораш кунанд.

Воқеан ҳам, Пешвои миллат муҳтарам Эмомалӣ Раҳмон солиёни дароз мешавад, ки ҳини сафари корӣ ба ҳамаи манотиқи мамлакат самимона бо хурду калон суҳбат меороянду аз кору бор, вазъи иҷтимоии одамони касбу кори гуногун, нафақахӯрон, хоссатан муаллимону табибони ҷавон пурсон мешаванд ва ҷиҳати ҳалли мушкилиҳои мавҷудаашон ба масъулин дастур медиҳанд. Ин иқдомҳои хайрҳонаи Сарвари давлат ба анъанаи хуб табдил ёфтааст. Маҳз ба туфайли чунин вохӯриву мулоқотҳо садҳо мушкилу муаммоҳои ҷавонони соҳибистеъдод бевосита дар ҷояш ҳалли худро пайдо мекунанд.    

Бо суоли он ки чаро ғамхории Президенти мамлакат нисбат ба ин омӯзгори ҷавон дар ин ноҳия ба таъхир уфтода, боиси нигаронии муаллифи мактуб шудааст, ҷиҳати дарёфти посухи мушаххас хабарнигори рӯзнома дар вилояти Суғд озими ноҳияи Кӯҳистони Мастчоҳ шуд.

Хайрулло Бобозода, раиси ноҳия, бо огоҳӣ аз мақсади сафари ман, дар иртибот ба мактуби Кишваршоҳ Ниёзӣ иброз дошт, ки мақомоти иҷроияи маҳаллии ҳокимияти давлатии ноҳия ҷиҳати пурра иҷро шудани дастури Сарвари давлат дар талош аст.

- Бо назардошти он ки ноҳия субвенсионисту ҳар як дирам маблағ зери назорат аст, тасмим гирифтем масъалаи иҷтимоии омӯзгори ҷавонро зина ба зина ҳаллу фасл кунем, - мегӯяд раиси ноҳия, - нахуст қитъаи замин ҷудо намудему баъдан як сар гов бо гӯсолааш дастрас кардем. Чанде қабл панҷ қуттӣ оилаи занбӯри асал ва барои бунёди манзил ба қадри имкон масолеҳи сохтмонӣ низ харидорӣ шуд ва бо мусоидтар омадани обу ҳаво, бо тариқи ҳашар ба сохтмон шурӯъ хоҳем кард.

Вале, омӯзгори ҷавон аз ин суръати иҷрои супориш қаноатманд нест. Ӯ пайваста ба мақомоти вилоятиву ноҳиявӣ муроҷиат дораду изҳори нигаронӣ. 

Ба андешаи раиси ноҳия, мақомоти иҷроияи маҳаллии ҳокимияти давлатии ноҳия аз иҷрои ин супориш ҳаргиз канораҷӯӣ накардааст, фақат бо назардошти имконот марҳила ба марҳила аз пайи иҷрои масоили Кишваршоҳ Ниёзӣ мебошад. Аз ин хотир, омӯзгор ҳам чун намояндаи яке аз табақаҳои пешқадами ҷомеа бояд ба хубӣ дарк кунад, ки иҷрои ҳама амал аз имконоти мавҷудаи  ноҳия бармеояду аз лиҳози нерумандии иқтисодӣ он нисбат ба дигар навоҳии кишвар маҳдудтар ва худ, ҳамзамон, дастнигар - дар ҳолати дотатсионӣ қарор дорад.

Вале, муаллифи мактуби шикоятӣ дар суҳбат бо мо бо овардани даҳҳо ҳуҷҷати посухи идораҳои вилоятию ноҳиявӣ изҳори ноумедӣ мекунаду ба ҳарфҳои раиси ноҳия ва мудири маориф эътимод надорад. 

- Ӯ ба ҳайси омӯзгори ҷавон касбашро дӯст медораду рисолаташро самимона ба иҷро мерасонад, - меафзояд мудири маорифи ноҳия, - мо низ  тасмим  дорем дар ҳашари бунёди манзили ҳамкасби ҷавонамон фаъолона иштирок намоем, то ин ки ҳамин сол ӯ соҳиби манзили замонавӣ шавад.   

Мулоқот бо масъулони мақомоти иҷроияи маҳаллии ҳокимияти давлатии ноҳияи Кӯҳистони Мастчоҳ моро эътимод мебахшад, ки ҳамаи он масоили дар муроҷиати шаҳрванд Ниёзӣ Кишваршоҳ омада, моҳҳои наздик комилан ҳаллу фасл хоҳанд шуд.              

 

Ҷовиди АШТӢ, “Ҷумҳурият”