Имрӯз анъана шудааст, ки соҳибкорони саховатпешаи  мо ба хотири пешрафти минбаъдаи Ватани азизамон ва фароҳам овардани шароити зиндагии арзанда барои сокинони кишвар дар доираи қобилияту қудраташон талош варзанд.

Дар ноҳияи Фархор низ бисёр соҳибкорон ба рушди деҳот, алалхусус, соҳаи маориф, саҳми арзанда гузоштаанд. Аз ҷумла, Хуршед Нозимов  бо маблағи зиёда аз 26 миллион сомонӣ муассисаи таълимии хатмнамудаи худро аз нав бунёд кард. 

Ӯ хатмкардаи муассисаи таҳсилоти миёнаи умумии № 2 мебошад. Бо сабаби камбудиҳои зиёд дар муассиса, ҳангоми дар мактаб хондан мегуфтааст, ки имкон ёбад дабистонро аз дигар месозад. Ва имрӯз бо даст додани имкони мусоид, ба қавли худ вафо кард. Соҳибкори саховатпеша, бо вуҷуди фаъолияташро дар Австрия идома додан, барои пешрафти кишвари хеш саҳм мегузорад, зеро худро фарзанди ин сарзамин медонаду вазифаи шаҳрвандии хешро дар ободонии диёр мебинад. Соли 2013, ҳангоме ки Сарвари давлат ба  ноҳияи Фархор сафар намуданд, барои сохтмони бинои МТМУ  № 2 санги асос гузоштанд ва сохтмони онро Хуршед Низомов ба уҳда гирифт. Сохтмон соли 2014 оғоз гардида, ҳоло бо тамоми шароити таълимӣ пурра барои қабули хонандагон омода аст.

Таълимгоҳи сеошёна иборат аз 34 синфхона буда, барои 2000 хонанда дар ду баст пешбинӣ шудааст. Синфхонаҳои фаннии химия, физика, биология, компютерӣ ва таълими меҳнат бо асбобу анҷоми лабораторӣ, дастгоҳҳои таҷрибавию омӯзишӣ таъмин гардидаанд. Толори варзиш,  маҷлисгоҳ, китобхона низ барои дар сатҳи баланд гузарондани машғулиятҳо мувофиқат мекунанд. 

- Нуқтаи муҳим ин аст, ки муассисаи таълимии мазкур се таълимгоҳи дигари ноҳияро аз таҳсил дар се баст озод мекунад, ки ин воқеан, барои хонандагон туҳфаи арзанда мебошад, - гуфт Хайрулло Шоҳимардонзода, мудири шуъбаи маорифи ноҳияи Фархор.

 

Лола РИЗОӢ, 

«Ҷумҳурият»