Маросими ифтитоҳи фестивал шоми 19 май дар саҳни Театри давлатии академӣ - драмавии опера ва балети ба номи Садриддин Айнӣ ботантана доир шуд. Дар ин чорабинии муҳими фарҳангӣ устодону донишҷӯён, муҳаққиқон ва дар маҷмӯъ дӯстдорони театр ширкат намуданд. Ин шом саҳни театр намои идона дошт.

Обид Назариён, муовини аввали вазири  фарҳанги кишвар, ҳадафи фестивал - озмунро  дар рушди драматургияи миллӣ, санъати театрии кишвар, таҳияи асарҳои баландмазмуни ватанӣ, баланд бардоштани сатҳи касбии коргардонҳо, ҳунармандон, рассомону оҳангсозон арзёбӣ намуда, аз ҷумла гуфт: « Ҳамоиши имсолаи аҳли театри тоҷик ба Ҷашни фархундаи 30 – солагии Истиқлолияти давлатӣ, соли эълон гардидани Душанбе – пойтахти фарҳангии кишварҳои  аъзои ИДМ ва ба 80 - солагии  Ҳунарпешаи халқии Тоҷикистон Ато Муҳаммадҷонов бахшида мешавад».

Фестивал бо намоиши «Булбули Хуҷанд», ки онро ҳунармандони  Театри мусиқӣ-мазҳакавии ба номи Камоли Хуҷандии шаҳри Хуҷанд  аз рӯи  асари Т. Озарахш  рӯи саҳна овардаанд, оғоз гардид.

Мавриди зикр аст, ки имсол бори нахуст даври аввали фестивал-озмун дар шаҳру вилоятҳои кишвар баргузор гардид ва сипас, дар шаҳри Душанбе натиҷагирӣ шуд. Дар ниҳоят 11 театри касбии ҷумҳурӣ  бо беҳтарин намоишҳои солҳои  2019 -2021 рӯи саҳна овардаашон ба даври ниҳоӣ роҳ ёфтанд. Рӯзҳои минбаъда ин намоишҳо дар театрҳои пойтахти кишвар – шаҳри Душанбе манзури дӯстдорони санъати театрӣ мегарданд.

Тибқи нақша дар ҷараёни баргузории фестивал-озмун ду мизи мудаввар: «Ато Муҳаммадҷонов – арбоби барҷастаи санъати касбии тоҷик» ва “Вазъи кунунии театрҳои Тоҷикистон” баргузор мегардад. 

Зимнан, Фестивал озмуни театрҳои касбӣ – «Парасту» анъанавӣ буда, дар ду сол як маротиба баргузор мегардад ва  дар он тамоми театрҳои касбии кишвар  ширкат менамоянд.

Фестивал то 25 – уми май идома ёфта, маросими ҷамъбасти он дар Театри давлатии академӣ - драмавии опера ва балети ба номи Садриддин Айнӣ баргузор мегардад.

 

Фарзонаи ФАЙЗАЛӢ, «Ҷумҳурият»