Ҳамасола дар Ватани маҳбубамон рӯзе таҷлил мегардад, ки дар он неруи созанда, ишқу зебоӣ, орзу ба ояндаи нек, матонату нусрат нуҳуфтааст. Он Рӯзи ҷавонони Тоҷикистон мебошад. Имсол ин сана дар таърихи кишвар бо ҳарфҳои тиллоӣ сабт шуд, зеро он ба Ҷашни 30 - солагии Истиқлолияти давлатии Ҷумҳурии Тоҷикистон рост омад. Дигар, саодату файзро ба ҷашн он афзуд, ки ҷавонони хушиқболи тоҷик дар арафаи ҷашнашон бо Пешвои муаззаму ҷавонпарвари хеш, ки ташаббускор дар самти дастгирии онҳо мебошанд, дар кохи пур аз нуру шукӯҳи Борбад мулоқот намуданд. Пешвои маҳбуби ҷавонон бо чеҳраю дили кушода ва самимона онҳоро бо ин санаи мубораку фархунда табрик намуданд: “Ҳар сол 23 - юми моҳи май мо яке аз ҷашнҳои муҳими Тоҷикистони соҳибистиқлол – Рӯзи ҷавононро таҷлил менамоем. Ба ин муносибат кулли ҷавонони кишвар ва ҳамаи шумо – ҳозирони гиромиро, ки такягоҳи боэътимоди давлат мебошед, самимона табрик мегӯям”.

Воқеан, 70 дарсади аҳолии кишварро ҷавонони то синни 35 - сола ташкил медиҳанд ва Тоҷикистон мамлакати ҷавонон ба шумор меравад. Ин нишондиҳанда боз ҳам ҷавононро муваззаф менамояд, ки масъулиятшиносу ташаббускор бошанд ва дар рушди кишвари азизамон дар тамоми соҳаҳо нақши созандаю бориз гузоранд. Зеро Президенти кишвар таъкид доштанд, ки барои амалӣ намудани тамоми ҳадафу мақсадҳои ободкоронаи ҷавонон давлату Ҳукумат омодаанд. “Нишондиҳандаи мазкур аз мо амалисозии тадбирҳои зиёдро дар самти таълиму тарбия ва рушди қобилиятҳои зеҳниву ҷисмонии насли ҷавони ҷомеа тақозо мекунад”, - зикр намуданд Сарвари давлат.

Баёни нуқтаи дигари муҳимро аз ин мулоқот ба маврид мешуморем, ки он ҳам эҳтимомҳои Ҳукумат, бавижа Президенти кишвар дар зарфи сӣ соли соҳибистиқлолӣ оид ба сиёсати давлатии ҷавонон, таҳияи даҳҳо санади меъёрии ҳуқуқӣ дар самти масъалаҳои сиёсиву иқтисодӣ ва иҷтимоиву фарҳангӣ оид ба дастгирии ҷавонон, масъалаи баланд бардоштани сатҳи маърифату саводнокӣ ва ба омӯзиши илму донишҳои замонавӣ фаро гирифтани онҳо, пеш аз ҳама, илмҳои табиӣ, риёзӣ ва дақиқ, кашфиёту навоварӣ, тавсеаи ҷаҳонбинӣ қабулу ба тасвиб расидааст, мебошад. Квотаи Президенти Ҷумҳурии Тоҷикистон, Стипендияи Президенти Тоҷикистон, Ҷоизаи давлатии ба номи Исмоили Сомонӣ, Стипендияи байналмилалии «Дурахшандагон», Бистсолаи омӯзиш ва рушди илмҳои табиӣ, риёзӣ ва дақиқ эълон гардидани солҳои 2020 – 2040, ҷоизаи махсус аз фанҳои риёзӣ, дақиқ ва табиӣ,  озмунҳои «Илм – фурӯғи маърифат» “Фурӯғи субҳи доноӣ китоб аст” аз ҳамин қабил мебошанд. 

Дигар ибтикори созандаи Ҳукумати кишварро ин ҷо ҳатман бояд таъкид намуд, ки он ҳам барои аз таҳсил дур намондани ҷавонон таъсиси муассисаҳои таҳсилоти олӣ дар минтақаҳои кишвар буд. Яъне таъсис додани 28 донишгоҳу донишкада, академия, консерватория ва мактаби олӣ. Ин тадбирҳо самараи некро ба амал оварданд, зеро: “агар соли 1991 муассисаҳои таҳсилоти олии касбии кишварро ҳамагӣ 13500 нафар донишҷӯ хатм карда бошад, дар соли 2020 шумораи хатмкунандагон ба 40000 расидааст”.

Президенти кишвар ба ҷавонон таъкид намуданд: “Мо аз ҷавонони кишвар умеди калон дорем, ки вақтро ғанимат шумурда, ба хотири ояндаи неки Ватан ва пешрафти давлати соҳибистиқлол, омӯхтани илму дониш, касбу ҳунар, забонҳои хориҷӣ ва аз худ кардани техникаву технологияҳои навтаринро вазифа ва мақсаду мароми ҳаррӯзаи худ қарор медиҳанд”. Барои ноил шудан ба мақсадҳои худ ва амалӣ намудани ин ҳидоятҳои падарона ҷавононро зарур аст, ки ба қадри вақту ҷавонии худ расанд, донишҳои худро афзун намоянд, рӯ оранд ба китоб ва васеъ намудани ҷаҳонбинии хеш. Дар фароварди суханронии худ Пешвои миллат зикр намуданд: “Мо ташаббусу пешниҳодҳои созандаи ҷавононро ҳамеша дастгирӣ намуда, барои амалӣ гардидани онҳо тамоми имкониятҳоро фароҳам месозем”.

Ба андешаи мо, аз ин минбари баланд, таъкид намудани омодагии Сарвари давлату Ҳукумат барои дастгириҳои созандаи ҷавонон минбаъд онҳоро вазифадор мекунад, то ки ҳамчун “табақаи аз ҳама фаъоли ҷомеа” барои пойбарҷо будани Истиқлолияти давлатӣ, сулҳу ваҳдати миллӣ талошҳои рӯзафзун намуда, дар пайи ободу зебо намудани Ватани маҳбубамон дар ҳаёти сиёсиву иҷтимоии давлат нақшгузору саҳмгузор бошанд.

 

 

Зебониссо БОБОАЛИЕВА, 

муовини ректори Донишкадаи 

давлатии забонҳои Тоҷикистон ба номи Сотим Улуғзода