Дар асоси нақшаи тасдиқнамудаи Дастгоҳи иҷроияи Президенти Ҷумҳурии Тоҷикистон ҷиҳати тақвияти корҳо дар самти тарбияи ҷавонону наврасон дар рӯҳияи худшиносиву ватандӯстӣ, ҳифзи худогоҳии миллӣ, арзишҳои олии инсонӣ, идомаи анъанаҳои неки бунёдкориву созандагӣ ва таҷлили сазовори Ҷашни бузурги миллӣ – 30 - солагии Истиқлолияти давлатӣ гурӯҳҳои таблиғотӣ ба шаҳру ноҳияҳои мамлакат сафари корӣ анҷом доданд. Дар гурӯҳҳои таблиғотӣ чанд нафар кормандони рӯзномаи «Ҷумҳурият» ҳам, шомил буданд, ки бо сокинони кишвар аз наз-дик шинос шуда, бо онҳо мулоқот карданд.

 

Гурӯҳи таблиғотӣ иборат аз 19 нафар таҳти роҳбарии Саид Ғоибназарзода, директори Пажӯҳишгоҳи идоракунии давлатӣ ва хизмати давлатии Академияи идоракунии давлатии назди Президенти Ҷумҳурии Тоҷикистон ба Вилояти Мухтори Кӯҳистони Бадахшон сафар кард. Дар ин сафар гурӯҳи корӣ дар маркази шаҳру ноҳияҳо, ҷамоатҳо, деҳаҳо ва минтақаҳои сераҳолӣ бо кормандони мақомоти давлатӣ, омӯзгорону хонандагон, хатибони масҷидҳо ва сокинони касбу кори гуногун дидору мулоқот анҷом дод. 

Вохӯриву суҳбатҳо собит намуданд, ки хурду бузурги вилоят сиёсати пешгирифтаи роҳбарияти олии мамлакатро якдилона ҷонибдорӣ намуда, аз 910 иншооти ҷашнӣ ба ифтихори 30 - солагии Истиқлолияти давлатӣ, аллакай, 658 иншоот мавриди истифода қарор дода шудаанд. Дар иншооти боқимонда корҳо бомаром идома ёфта, то ҷашни бузурги миллӣ мавриди истифода қарор мегиранд. Дар ин кори хайр, дар баробари мақомот, соҳибкорони алоҳида низ ташаббус нишон дода, сохтмони иншооти хизматрасонии иловагиро ба ӯҳда гирифтаанд, ки 186 ададро ташкил медиҳад.

Саид Ғоибназарзода, роҳбари гурӯҳи таблиғотӣ дар ВМКБ, зимни мулоқот бо сокинони шаҳри Хоруғ ва дигар навоҳии вилоят вобаста ба дастгирии ҷавонон таъкид кард, ки давоми 30 соли Истиқлолияти давлатӣ дар самти баланд бардоштани нақши ҷавонон дар ҳаёти ҷомеа, муҳайё сохтани шароити мусоид барои таълиму тарбияи онҳо, илму касбомӯзӣ, аз худ кардани забонҳои хориҷӣ ва технологияи муосири иттилоотию коммуникатсионӣ тамоми шароити зарурӣ муҳайё буда, инчунин, барои амалӣ намудани ташаббусҳои ҷавонон аз ҷониби Ҳукумати Ҷумҳурии Тоҷикистон заминаи мусоид фароҳам оварда шуд.

Собиқадори соҳаи маориф Асматуллоев Хушқадам зимни суханронӣ барои ғамхориҳо ва таваҷҷуҳи хосса ба Президенти мамлакат муҳтарам Эмомалӣ Раҳмон арзи сипоси самимӣ намуда, таъкид дошт, ки чунин суръати пешрафти маорифро таърихи кишвар дар хотир надорад. Дар тамоми муассисаҳои таълимӣ шароити беҳтарини таълиму тарбия фароҳам оварда шуда, он бо таҷҳизоти муосир муҷаҳҳаз мебошанд.

Дар вохӯрӣ бо сокинони ноҳияи Ванҷ Фарҳод Маҳмадшозода, муовини директори Маркази миллии қонунгузории назди Президенти Ҷумҳурии Тоҷикистон, таъкид кард, ки масъалаҳои таъмини амнияти милливу минтақавӣ яке аз самтҳои асосии сиёсати дохиливу хориҷии Ҷумҳурии Тоҷикистон ба ҳисоб меравад. Дар тӯли 30 соли Истиқлолияти давлатӣ аз ҷониби Ҳукумати кишвар дар самти мазкур корҳои назаррас ба анҷом расонда шуданд. Санадҳои меъёрӣ-ҳуқуқии комил ташаккул ёфтанд, ки барои муборизаи самаранок бо терроризму экстремизм, гардиши ғайриқонунии маводи мухаддир ва дигар ҷиноятҳои муташаккили фаромиллӣ дар чаҳорчӯбаи қонун имконият фароҳам овардаанд.

- Яке аз масъалаҳои ташвишовар шомил шудани баъзе ҷавонон ба ҳизбу ҳаракатҳои экстремистиву террористӣ ва дастгир шудану маҳкум гардидани онҳо мебошад. Ба ақидаи донишмандон чанд сабаби шомил шудани ҷавонон ба гурӯҳҳои ифротгаро мавҷуд аст, ки асоситаринаш паст будани савияи дониш ва надоштани саводи кофии  динию сиёсӣ мебошад. Ҷиҳати пешгирии ин "вабои аср" бояд сатҳи дониши динию сиёсии ҷавонон баланд бардошта шавад, чунки дар асри XXI яроқи асосӣ дигар тӯпу танк не, балки дониш, маҳорат ва илму адаб аст, - иброз дошт номбурда.

Бояд гуфт, ки сарфи назар аз дурдаст будани ноҳияи Ванҷ он дар давраи соҳибистиқлолӣ хеле ободу зебо гардида, биноҳои маъмурӣ ва пулу роҳҳо бунёд гардиданд. Танҳо дар арафаи Ҷашни 30 - солагии Истиқлолияти давлатӣ 86 иншоот ба нақша гирифта шуда, аллакай, 55 адад ба истифода дода шуд.

Ба ҳамин тартиб, дар тамоми шаҳру ноҳияҳои вилоят аз ҷониби гурӯҳҳои таблиғотии Дастгоҳи иҷроияи Президенти Ҷумҳурии Тоҷикистон бо сокинон мулоқот доир гардид.

Гурӯҳи таблиғотӣ ва сокинони сарбаланди Бадахшон бо итминон изҳори умед карданд, ки то Ҷашни 30 - солагии Истиқлолияти давлатӣ Ҳукумати Ҷумҳурии Тоҷикистон ва шаҳрвандони кишвар дар ҳамдастӣ корҳои зиёди бунёдгаронаро анҷом медиҳанд ва маҳсули дастранҷи онҳо ба тавлиди ҳазорон ҷойҳои нави корӣ ва болоравии сатҳи зиндагии аҳолӣ мусоидат хоҳад кард.

 

Лашкар  ШАРИФЗОДА, “Ҷумҳурият”, 

Душанбе - ВМКБ - Душанбе