Масъалаҳои татбиқи самараноки сиёсати давлатии соҳаи сайёҳӣ, имкониятҳои сайёҳӣ дар вилоят Суғд, саҳми сайёҳии экологӣ дар ҳифз ва муаррифии объектҳои табиӣ, таъмини бехатарии сайёҳон ҳангоми сафар, сайёҳии зиёратӣ дар муаррифии объектҳои таърихӣ ва фарҳангӣ, омода намудани мутахассисони соҳаи сайёҳӣ, имкониятҳои ташкили хатсайрҳо бо мақсади рушди сайёҳии дохилӣ ва дигар масъалаҳои марбут ба рушди самараноки фаъолияти сайёҳӣ дар конференсияи миллии сайёҳӣ таҳти унвони “Сайёҳии дохилӣ – омили рушди иқтисодӣ”, ки дар шаҳри Панҷакент баргузор гардид, мавриди баррасӣ қарор гирифтанд.

Чорабинӣ дар партави дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, бо мақсади татбиқи ҳадафҳои Солҳои рушди деҳот, сайёҳӣ ва ҳунарҳои мардумӣ бо ибтикори Кумитаи рушди сайёҳӣ дар ҳамкорӣ бо мақомоти иҷроияи ҳокимияти давлатии вилояти Суғд доир шуд. Дар кори ҳамоиш намояндагони Кумитаи рушди сайёҳӣ, вазорату идораҳо, суъбектҳои хизматрасони сайёҳӣ ва ВАО ширкат варзиданд.

Муовини раиси шаҳри Панҷакент Муҳаммадсодир Сафарзода иброз дошт, ки шаҳри бостонии Панҷакент барои рушди сайёҳии таърихию фарҳангӣ ва этнографӣ, инчунин, сайёҳии экологӣ мусоид мебошад. Дар ҳудуди шаҳри Панҷакент беш аз 350 ёдгории таърихӣ, манзараҳои нотак-рори табиӣ, мавзеъҳои истироҳатию сайёҳӣ, ба монанди Кӯликалон, Ҳафткӯл ва ғайра мавҷуданд. Дар ин минтақа сайёҳон бештар ба хатсайрҳои кӯҳӣ таваҷҷуҳ менамоянд. Барои ин гурӯҳҳо дар мавзеъҳои машҳури Ҳафткӯл ва Кӯликалон пойгоҳҳои пазироии сайёҳон бо ҳама шароити созгор ташкил шуда, ҳоло бунёди нуқтаҳои қабули сайёҳон дар хатсайрҳои кӯҳӣ идома доранд. Итминони комил дорем, ки ҳамкориҳои мутақобилан судманди мақомоти дахлдор, ташкилотҳои ҷамъиятӣ, ширкатҳои сайёҳӣ, соҳибкорон ва дигар сохторҳои дахлдор татбиқи амалии хешро пайдо намуда, дар рушди сайёҳӣ дар минтақаҳо такони ҷиддӣ мебахшад ва соҳа марҳила ба марҳила ба яке аз соҳаҳои муҳими иқтисодиёт табдил меёбад. 

Абдукарим Қурбонзода, намояндаи Кумитаи рушди сайёҳӣ бо баёни тавсияҳо оид ба беҳтар намудани сифати хизматрасонӣ дар сатҳи маҳал таъкид дошт, ки таҳия ва чопи маводҳои таблиғотии соҳа барои ҷалби сайёҳон ва муаррифии мавзеъҳои тамошобоби минтақа аз ҷумлаи масъалаҳои муҳиме мабошад, ки бояд рафъ шаванд. Новобаста аз он ки ширакатҳои сайёҳӣ бо назардошти хатсайрҳо ва барномаҳои хеш маълумотҳо таҳия ва нашр мекунанд, талабот ба маълумоти вобаста ба объектҳои хизматрасонӣ хеле зиёд боқӣ мемонад. Агар мо ҳамагӣ 1000 дона маълумот нашр намоем, талабот вобаста ба гардиши сайёҳон ба минтақаҳои сайёҳии мамлакат бамаротиб меафзояд. Бино ба натиҷаҳои як таҳлил, ки Кумитаи рушди сайёҳӣ анҷом дод, муаррифгари асосии захираҳои сайёҳии Тоҷикистон воситаҳои ахбори омма мебошанд. Дар ин замина бо ташаббуси кумита дар соли равон инфотуру пресс - турҳо ба минтақаҳои сайёҳии  Кӯлобу дараи Ромит ва водии Зарафшон ташкил гардида, чунин чорабиниҳо дар дигар минтақаҳои кишвар низ роҳандозӣ мегарданд. Инчунин, яке аз воситаҳои тарғибу ташвиқи имкониятҳои сайёҳӣ метавонанд шабакаҳои иҷтимоӣ бошанд. Ин воситаро ҳар нафари ватандӯсту соҳибфарҳанг метавонад, мустақилона пеш гирад.

Шодмонқул Сангинов, раиси ширкати сайёҳии «Саёҳати Ҳафткӯл» зимни баромади худ дар конференсия бо таассуф изҳор дошт, ки агар 10 нафарро пурсем, ки Хафткӯлро дидаед, ҷавоби нуҳ нафарашон не хоҳад буд. Бинобар ин, мо мехоҳем сайёҳиро аз рушди сайёҳии дохилӣ шурӯъ намоем. Ба ин Ҳукумати мамлакат, Кумитаи рушди сайёҳӣ, шуъбаи рушди сайёҳии вилоят ва бахши сайёҳии шаҳр ҳам аҳамияти хоса зоҳир менамоянд. Ҳоло ки сарҳадҳо бастаанд, бо роҳи рушди сайёҳии дохилӣ метавонем каме ҳам бошад, ширкатҳои сайёҳиро дастгирӣ кунем. Хуб мешуд, ки чунин семинарҳо дар пойгоҳҳои сайёҳии Артуч ё Ҳафткӯл доир мешуданд ва бо ин ширкатдорон дар баробари иштирок дар конфронс аз мавзеъҳои зебои табиӣ дидан мекарданд. 

Дар кори ҳамоиш, ҳамчунин, масъулони мақомот ва роҳбарони субъектҳои хизматрасонӣ вобаста ба имкониятҳои мусоиди ҷалби сармоягузории дохилию хориҷӣ ба рушди инфрасохтори сайёҳӣ дар шаҳри Панҷакент, иқтидори табиӣ, экологӣ, аграрӣ ва таърихию фарҳангии шаҳр ҳамчун омили рушди туризми экологию аграрӣ ва имкониятҳои ташкили хатсайрҳои нави сайёҳӣ мубодилаи афкор намуданд.

 

Шаҳноз ҚУРБОН,  «Ҷумҳурият»