Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ Раиси Вулуси ҷиргаи (Маҷлиси намояндагони) Шӯрои миллии Ҷумҳурии Исломии Афғонистон Мир Раҳмон Раҳмониро, ки ҷиҳати ширкат дар ҷаласаи Ассамблеяи парламентии Созмони Аҳдномаи амнияти дастаҷамъӣ ба ҳайси мушоҳид ба Ҷумҳурии Тоҷикистон ташриф овардааст, ба ҳузур пазируфт. 

Дар мулоқот зикр гардид, ки пайвандҳои бародарии мардумони Тоҷикистон ва Афғонистон аз қаъри таърих маншаъ гирифта, зербинои мустаҳками равобити муосири ду кишвар мебошанд. Густариши минбаъдаи муносибатҳои дуҷонибаю бисёрҷониба бо Ҷумҳурии Исломии Афғонистон аз самтҳои афзалиятноки сиёсати хориҷии давлати соҳибистиқлоли Тоҷикистон муқаррар гардида, дар ин раванд парламентҳо ба сифати ниҳоди калидии давлат дар  густариши ҳамкории байни кишварҳо нақши муҳим доранд.

Ҷонибҳо изҳор доштанд, ки мардуми Тоҷикистону Афғонистон хуб дарк менамоянд, ки маҳз тавассути талошу пайгириҳои муштараки Президенти Ҷумҳурии Тоҷикистон муҳтарам Эмомалӣ Раҳмон ва роҳбарияти олии Ҷумҳурии Исломии Афғонистон равобит ва ҳамкорӣ миёни кишварҳои мо дар давраи соҳибистиқлолии Ҷумҳурии Тоҷикистон ба таври бесобиқа рушд ёфтанд.

Зикр гардид, ки Тоҷикистон ҳамеша пуштибону ҷонибдори кӯшишу талошҳои Ҳукумати Афғонистон ва ҷомеаи ҷаҳон бобати ба роҳ мондани раванди музокироти сулҳ, ба эътидол овардани вазъи сиёсиву низомӣ ва таъмини рушди иҷтимоиву иқтисодии кишвари дӯсту ҳамсоя мебошад. Таъмини суботу оромии Афғонистон барои Тоҷикистон хеле муҳим буда, дар баробари таъмини амнияти минтақавӣ, аҳамияти бузурги иқтисодиву иҷтимоӣ низ касб менамояд. 

Бо қаноатмандӣ гуфта шуд, ки маҳз бо ташаббуси Президенти Ҷумҳурии Тоҷикистон баҳри дар амал татбиқ намудани сиёсати босамари хориҷии Ҳукумати мамлакат ва бо мақсади таҳкими робитаҳои гуногунҷанба, дар болои дарёи Панҷ байни Тоҷикистону Афғонистон пулҳои дӯстӣ бунёд карда шудаанд.

АМИТ "Ховар"