19 июл дар Қасри миллат Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо иштироки Сарвазири Ҷумҳурии Тоҷикистон, муовинони Сарвазир, Роҳбари Дастгоҳи иҷроияи Президенти Ҷумҳурии Тоҷикистон, раиси шаҳри Душанбе, ёрдамчиёни Президент ва роҳбарони як қатор вазорату идораҳои давлатӣ машварати корӣ доир карданд.

 

Дар он масъалаҳо оид ба омодагиҳо ба санаи муҳими таърихӣ – 30-солагии Истиқлоли давлатии Ҷумҳурии Тоҷикистон, баргузории ҷаласаи Шӯрои сарварони давлатҳои аъзои Созмони ҳамкории Шанхай, инчунин, дигар чорабиниҳои муҳими ҷумҳуриявӣ мавриди баррасӣ қарор гирифтанд.

Оид ба омодагиҳо ба баргузории ҷаласаи ҷашнии Шӯрои сарварони давлатҳои аъзои Созмони ҳамкории Шанхай ҳисоботи Сарвазири Ҷумҳурии Тоҷикистон, раиси Кумитаи тадорукот оид ба омодагӣ ва баргузории ҷаласаи Шӯрои сарварони давлатҳои аъзои Созмони ҳамкории Шанхай Қоҳир Расулзода шунида шуд.

Сарвари давлат муҳтарам Эмомалӣ Раҳмон ба Ҳукумати кишвар супориш доданд, ки барои татбиқи нақшаҳои созандагию бунёдкорӣ ҷиҳати сазовор истиқбол гирифтани ҷашни миллии Истиқлоли давлатӣ ва дар сатҳи баланди мизбонӣ баргузор кардани чорабинии сатҳи баланди минтақавӣ - 20-солагии таъсиси Созмони ҳамкори Шанхай тадбирҳои мушаххас амалӣ шаванд.

Мақомоти иҷроияи ҳокимияти давлатии вилоятҳо, шаҳру ноҳияҳо ва ташкилоту идораҳои давлатӣ ҷиҳати омодагии ҳаматарафа ба маъракаи зимистонгузаронӣ, захираи кофии маводи хӯрокворӣ ва сӯзишворӣ, таъмини муассисаҳои иҷтимоӣ ва аҳолӣ бо гармӣ супориши мушаххас гирифтанд.

Ба Вазорати маориф ва илм ва мақомоти иҷроияи ҳокимияти давлатии вилоятҳо ва шаҳру ноҳияҳои кишвар дастур дода шуд, ки ҷиҳати сари вақт анҷом додани таъмиру таҷдиди муассисаҳои таълимӣ ва омодагии иншооти соҳа ба соли нави таҳсили 2021 – 2022 чораҷуӣ намоянд.

Вазорати тандурустӣ ва ҳифзи иҷтимоии аҳолӣ супориш гирифт, ки ҷиҳати пешгирӣ аз паҳншавии бемории сироятии COVID – 19 эмгузаронии пурраи аҳолиро таъмин намуда, байни мардум корҳои фаҳмондадиҳиро барои риояи қоидаҳои беҳдоштӣ ва санитарӣ пурзӯр намояд.

Супоришҳои дигар ба вазорату идораҳои дахлдор вобаста ба барқарор кардани оқибатҳои офатҳои табиӣ, расондани кумакҳои моддӣ ба зарардидагон, таъмини нақшаи кишти такрорӣ ва ҷамъоварии беталафи ҳосил дода шуд.