Дар Душанбе иштирокдорони ҷаласаи Шӯрои вазирони мудофиаи давлатҳои аъзои Созмони ҳамкории Шанхай оид ба масъалаҳои мубрами амнияти байналмилалӣ ва минтақавӣ мубодилаи афкор намуданд.

Вазирони мудофиа бо ҳамгироии тарафайн изҳор доштанд, ки таҳияву ҳамоҳанг намудани амалиёти муштараки Қувваҳои Мусаллаҳи давлатҳои аъзои СҲШ дар ташкилу баргузории машқҳои дастаҷамъонаи зиддитеррористии Ситодӣ - фармондеҳӣ таҳти унвони «Рисолати сулҳҷӯёна - 2021» ба сайқали таҷриба ва маҳорату малакаи касбии ҷузъу томҳо дар самти безарар гардондани ташкилоти байналмилалии террористӣ ва дигар зуҳуроти хатарзои ҷомеаи муосир мусоидат менамояд.

Бо нигаронӣ аз бадшавии босуръати вазъ дар Афғонистон, зарурати пешгирии ташаннуҷи вазъ дар фазои СҲШ - ро тазаккур дода, афзоиши назарраси фаъолияти ташкилоти террористиро дар минтақа пас аз хуруҷи неруҳои СПАШ ва кишварҳои дигар аз Афғонистон таъкид намуданд.

Қарор шуд, ки ҷаласаи навбатии шӯро соли 2022 дар Ӯзбекистон гузаронда шавад.

 

 

Мулоқоти вазири молияи Тоҷикистон бо вазири молия ва иқтисоди Туркманистон

Вазири молияи Ҷумҳурии Тоҷикистон Файзиддин Қаҳҳорзода бо вазири молия ва иқтисоди Туркманистон Мухаммедгелди Сердаров мулоқот намуд. 

Вохӯрӣ дар ҳошияи баргузории ҷаласаи 10-уми Комиссияи муштараки байниҳукуматии Тоҷикистон ва Туркманистон оид ба ҳамкории иқтисодию тиҷоратӣ ва илмию техникӣ доир гардид.

Ҷонибҳо атрофи масъалаҳои рушди ҳамкорӣ дар соҳаҳои гуногуни иқтисодиёт мубодилаи афкори судманд анҷом доданд.

 

 

Бонки миллӣ дархости «Тоҷиксармоягузор» - ро қонеъ накард

Бо қарори раёсати Бонки миллии Тоҷикистон бо мақсади устувории молиявии низоми суғуртаи кишвар дархости КВД суғуртавии «Тоҷиксармоягузор» ҷиҳати тамдид намудани муҳлати амали иҷозатнома, бинобар ҷавобгӯ набудани фаъолияти он ба талаботи қонунгузории соҳавӣ, қонеъ карда нашуд.

Қарори  мазкур мутобиқи қонунҳои Ҷумҳурии Тоҷикистон «Дар бораи Бонки миллии Тоҷикистон» ва «Дар бораи иҷозатномадиҳӣ ба баъзе намудҳои фаъолият» қабул гардидааст.

Дар робита ба иҷрои қарори мазкур Идораи назорати суғуртавӣ уҳдадор гардид, ки дар Феҳристи ягонаи давлатии иштирокчиёни касбии бозори суғурта сабти дахлдор ворид намояд.

 

 

Азнавбақайдгирӣ барои иштирок дар озмуни тақсимоти такрорӣ

Аз 11 то 14 август дар Маркази миллии тестӣ азнавбақайдгирӣ барои иштирок дар озмуни тақсимоти такрорӣ гузаронда мешавад. Ба довталабон тавсия дода мешавад, ки интихоби дурусти худро ба роҳ монанд. Зеро дар давраи озмуни тақсимоти такрорӣ довталаб аз рӯи баллҳои бадастовардааш ба гурӯҳи ихтисоси такрории интихобнамудааш номнавис мешавад. 

Марказ ба диққати довталабоне, ки ба озмуни тақсимоти асосии довталабон роҳ ёфта, лекин дар озмуни тақсимоти мазкур аз рӯи ихтисоси интихобкардаашон комёб нагардиданд, мерасонад, ки азнавбақайдгирии чунин довталабон барои иштирок дар озмуни тақсимоти такрорӣ аз рӯи ҷойҳое, ки тибқи нақшаи қабули донишҷӯён ба муассисаҳои таълимии таҳсилоти миёна ва олии касбӣ баъд аз озмуни тақсимоти асосии имтиҳонҳои марказондаи дохилшавӣ дар соли 2021 холӣ мондаанд, дар якчанд нуқтаҳои бақайдгирии шаҳру ноҳияҳои ҷумҳурӣ ба роҳ монда мешавад.

 

 

COVID - 19. 78 ҳолати нави сироят

Шабонарӯзи охир дар Тоҷикистон 78 ҳолати нави гирифторшавии шаҳрвандон ба бемории COVID - 19 қайд гардид. Ҳамчунин, 86 нафар аз ин беморӣ табобат ёфт.

Дар маҷмӯъ, аз аввали бақайдгирӣ то 31 июл дар кишвар 15082 нафар гирифтори COVID-19 сабт шуда, аз ин шумора то санаи мазкур 14556 кас (96,5%) шифо ёфт.