Тайи шаш моҳи аввали соли равон 2241 шаҳрванд ба раёсати агентӣ барои пайдо намудани ҷойи кор муроҷиат карда, аз онҳо 1186 кас, мувофиқи талаботи Қонуни Ҷумҳурии Тоҷикистон «Дар бораи мусоидат ба шуғли аҳолӣ», ба қайд гирифта шуд. Дар ин давра 991 кас дар соҳаҳои гуногуни хоҷагии халқ бо ҷойи кори доимӣ, мавсимӣ ва муваққатӣ таъмин шуд. 

Мувофиқи талаботи бозори меҳнат аз ҳисоби бекорони дарқайдбуда, 185 хоҳишманд аз рӯи ихтисосҳои гуногун ба омӯзиши кӯтоҳмуддат, аз ҷумла муҳосиб – оператор, муҳосиб, ҳунари кафшергарӣ, қолинбофӣ, дӯзандагӣ, сӯзанидӯзӣ, қаннодӣ ва барқкор фаро гирифта шуд, ки 123,3 дарсади нақшаро ташкил медиҳад". 

Инчунин, 355 шаҳрванд тариқи худмаблағгузорӣ соҳибкасб гардид. Бо мақсади боз ҳам бештар ба шуғл фаро гирифтани корҷӯён раёсати агентӣ аз имкониятҳои мавҷуда самаранок истифода карда, дар шаш моҳ бо иштироки 41 корхонаю ташкилот ҳашт ярмаркаи ҷойҳои кори холӣ ва вазифаҳои озод баргузор карданд. Тавассути ярмаркаҳо 88 кас бо ҷойи кори доимӣ, мавсимӣ ва муваққатӣ таъмин гардид.

Ба 30 шаҳрванд барои пешбурди соҳибкорӣ дар соҳаҳои гуногун ба маблағи 99 ҳазор сомонӣ қарзи имтиёзнок дода шуд. 98 нафар, аз ҷумла сарбозони аз сафи Қувваҳои Мусаллаҳ баргашта ва нафарони аз муассисаҳои ислоҳӣ озодшуда ба маблағи беш аз 76 ҳазор сомонӣ кумакпулӣ гирифтанд. 

- Қатъи назар аз муваффақиятҳои нимсолаи аввали соли равон, моро зарур аст, ки фаъолиятро тақвият бахшида, дар мавриди ташкили ихтисосҳои зарурӣ тибқи дастури Пешвои миллат тадбирҳои мушаххас андешем. Илова бар ин, роҳбарияти ташкилоту муассиса, корхонаву дигар ниҳодҳо бояд, ки бо мақсади таъминоти аҳолӣ бо ҷойи кор ва ба ин васила, коҳиш додани сатҳи муҳоҷирати меҳнатӣ ҳамкориро тақвият бахшанд, - илова кард Саодат Буҳоваддинова.