Ҳайати порлумонии Ҷумҳурии Тоҷикистон таҳти роҳбарии Раиси Маҷлиси намояндагони Маҷлиси Олӣ Маҳмадтоир Зокирзода бо даъвати расмии Ҷумҳурии Исломии Эрон ҷиҳати иштирок дар маросими савгандёдкунии Президенти тозаинтихоби ин кишвар Сайид Иброҳим Раисӣ ба шаҳри Теҳрон сафар намуд. Дар ин бора маркази матбуоти Маҷлиси намояндагон иттилоъ дод.

Маҳмадтоир Зокирзода дар дидор бо раиси гурӯҳи дӯстии байнипорлумонии Маҷлиси Шӯрои исломии Ҷумҳурии Исломии Эрон Ҷалил Раҳимӣ Ҷаҳонободӣ гуфт, ки ҳадафи сафари ҳайати мо рушди бештари робитаҳои байнипорлумонии ду кишвар, тавсеаи муносибатҳои дуҷониба, табодули таҷрибаи порлумонӣ, маҷмӯи равобити дӯстона ва ҳамкории барои ҳар ду ҷониб судманд мебошад.

 

 

Вохӯрии Прокурори генералии Тоҷикистон бо муовини Дабири кулли СММ

Дар доираи сафари корӣ ба Австрия Прокурори генералии Ҷумҳурии Тоҷикистон Юсуф Раҳмон бо роҳбари дафтари Созмони Милали Муттаҳид дар Вена, раиси Раёсати СММ оид ба маводи мухаддир ва ҷинояткорӣ, ҳамзамон, муовини Дабири кулли СММ Ғода Фатҳӣ Валӣ мулоқот намуд. Дар ин бора маркази матбуоти Прокуратураи генералӣ хабар дод.

Зимни мулоқот вазъи амниятии Афғонистон, хатару чолишҳои вазъи кунуниӣ ба Тоҷикистон ва дигар кишварҳои ҷаҳон, зиёд шудан ва зарурати пурзӯр намудани муқовимат ба гардиши ғайриқонунии маводи нашъадор, муқовимат ба терроризм ва маблағгузории он, мубориза бо ҷинояткории муташаккили фаромиллӣ, харидуфурӯши одамон, муҳоҷирати ғайриқонунӣ, мубориза бо коррупсия, мусоидат дар татбиқи муштараки «Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021-2025» ва дигар масъалаҳои мубрами ҳуқуқӣ баррасӣ шуданд.

 

 

Мулоқоти cафири тоҷик бо муовини вазири корҳои хориҷии Кувайт

Сафири Ҷумҳурии Тоҷикистон дар Давлати Кувайт Зубайдулло Зубайдзода бо муовини вазири корҳои хориҷии ин кишвар оид ба масъалаҳои ташрифот Зорӣ Аҷрон ал-Аҷрон мулоқот кард.

Зимни суҳбат таҳким ва тақвияти ҳамкориҳо дар соҳаҳои мавриди таваҷҷуҳи муштарак баррасӣ гардида, атрофи масъалаҳои муҳими байналмилалӣ ва минтақавӣ, махсусан, паҳншавии мавҷи нави COVID-19 дар ҷаҳон ва вазъияти Афғонистон дар пасманзари хуруҷи неруҳои Амрико табодули афкор сурат гирифт.

 

 

Ҳушдор! Қоидаҳои беҳдоштиро қатъиян риоя намоед

Давоми шабонарӯзи охир дар ҷумҳурӣ 71 ҳолати нави гирифторшавии шаҳрвандон ба бемории коронавируси нави COVID - 19 ба қайд гирифта шуд. Ҳамчунин, 79 нафар аз ин беморӣ табобат ёфт, - хабар медиҳад маркази матбуоти Вазорати тандурустӣ ва ҳифзи иҷтимоии аҳолӣ.

Дар маҷмӯъ, аз аввали бақайдгирӣ то 4 август дар кишвар 15364 нафар гирифтори COVID – 19 сабт шуда, аз ин шумора то санаи зикргардида 14867 кас (96,8%) шифо ёфт.

Вазорати тандурустӣ ва ҳифзи иҷтимоии аҳолӣ аз тамоми сокинони кишвар даъват ба амал меорад, ки дар ҷойҳои ҷамъиятӣ қоидаҳои пешгирикунандаи бемории коронавирусро қатъиян риоя намоянд.