Тавре мавсуф афзуд, ҷиҳати иҷрои саривақтии дастуру супоришҳои Сарвари давлат муҳтарам Эмомалӣ Раҳмон, ки зимни Паём ба Маҷлиси Олӣ (26 январи соли 2020) ироа гаштанд ва Фармони Президенти Ҷумҳурии Тоҷикистон аз 28 майи соли равон “Дар бораи зиёд намудани андозаи нафақаҳои гурӯҳҳои алоҳидаи нафақагирон, ки ба онҳо нафақа аз рӯи маъюбӣ таъйин ва пардохт мегардад”, аз ҷониби агентӣ тамоми тадбирҳои зарурӣ андешида шудаанд. Фармони мазкур тахминан 100 ҳазор шаҳрванди маъюбро фаро мегирад ва   барои пардохти нафақа дар буҷети суғуртаи иҷтимоӣ ва нафақа 15,6 миллион сомонӣ пешбинӣ шудааст.  

Ба гуфтаи Дилмурод Давлатзода дар шашмоҳаи аввал ба буҷети суғуртаи иҷтимоӣ ва нафақа аз ҳисоби андози иҷтимоӣ, ки манбаи ягонаи даромад мебошад, 1 миллиарду 669,3 миллион сомонӣ ворид гардид. Аз маблағҳои воридгардида 1 миллиарду 531,2 миллион сомонии он барои пардохти нафақаву ёрипулиҳои иҷтимоӣ интиқол шуд. 

Пешгирӣ ва бартараф намудани омилҳои мусоидаткунандаи коррупсия яке аз ҳадафҳои асосӣ ва муҳими низоми суғуртаи иҷтимоӣ ва нафақа ба ҳисоб меравад. Агентӣ вазифадор шудааст, ба масъалаи интихоб ва ҷобаҷогузории кадрҳо диққати махсус дода, барои тоза кардани ҳайати кадрӣ аз кормандони тасодуфӣ ва пешгирии содиршавии кирдорҳои номатлуб чораҳои зарурӣ андешад. Дар робита ба ин, аз соли 2019 то моҳи майи соли ҷорӣ 40 нафар аз мансаби роҳбарикунанда озод шуда, ба кор бештар занону ҷавонони лаёқатманд ҷалб гаштанд. 

Дилмурод Давлатзода иброз дошт, ки яке аз масъалаи дигари ҳалталаби соҳа, пешниҳод нагардидани ҳисобот аз ҷониби соҳибкорон аст. Имрӯзҳо агар низоми ҷалби соҳибкорон ба суғуртаи давлатии иҷтимоӣ ва дар ин замина, таъйину пардохти нафақаи онҳо ба роҳ монда шуда бошад ҳам, масъалаи пешниҳоди ҳисоботи онҳо душвориҳо оварда истодааст. Моро зарур аст, ки дар ҳамдастӣ ба масъалаи фаҳмондадиҳии соҳибкорон таваҷҷуҳи бештар зоҳир намоем, зеро дар мавриди таъйини нафақа, маълумотҳое ба инобат гирифта мешаванд, ки аз ҷониби худи онҳо дар муддати фаъолият пешниҳод шудаанд. Дар мавриди набудани ҳисобот ё пардохт нагардидани андозҳои иҷтимоӣ ба онҳо нафақа таъйин намешавад. Душвории дигари соҳа, бастани шартнома бо корхонаву муассисаҳое мебошад, ки шароити махсус ва ё махсусан вазнини корӣ доранд. Нисбат ба шаҳрвандоне, ки дар чунин шароитҳои корӣ фаъолият мекунанд, бояд мувофиқи Қонуни Ҷумҳурии Тоҷикистон «Дар бораи суғуртаи ҳатмии нафақавии касбӣ» ҳамчун имтиёз аз панҷ то даҳ сол қабл аз расидан ба синни нафақа, вобаста ба сатҳи вазнинии фаъолият нафақаи касбӣ муқаррар мегардад. Нафақаи касбӣ танҳо дар мавриди бастани шартномаи дуҷониба байни корфармо ва муассисаи суғурта таъйин мешавад. 

- Корхонаву муассисаҳое, ки шароити кории ба саломатии инсон зараровар доранд, бо мақсади ҳифзи ҳуқуқҳои иҷтимоии кормандони худ, бо муассисаи суғуртаи иҷтимоӣ бояд шартнома банданд. Ин низом ҳатмӣ буда, аз як тараф агар фардо ба кормандони худи корхона барои барқарор кардани зиёни ба саломатии онҳо расондашуда манфиатовар бошад, аз ҷониби дигар, набастани шартнома риоя накардани талаботи қонунгузорӣ буда, ба муҷозоти маъмурӣ оварда мерасонад, - илова кард Дилмурод Давлатзода.