Музаффар Юнусов, мудири шуъбаи иттилоотию таҳлилии дастгоҳи раиси вилоят, ба «Ҷумҳурият» гуфт, ки бо мақсади иҷрои Амри Президенти Ҷумҳурии Тоҷикистон «Оид ба корҳои ободонию созандагӣ бахшида ба Ҷашни 30 - солагии Истиқлолияти давлатӣ» дар шаҳр бунёду навсозии беш аз 500 иншооти иҷтимоию иқтисодӣ ба нақша гирифта шудааст. То ин дам нақшаи пешбинишуда 92 дарсад иҷро гардид. 

Ба гуфтаи ӯ, чанде пеш дар деҳаи Шӯробқалъаи Ҷамоати деҳоти ба номи Ғафурҷон Ортиқови шаҳр майдончаи варзиш барои футболи хурд мавриди баҳрабардорӣ қарор гирифт. Иншооти ҷашнӣ аз тарафи соҳибкори маҳаллӣ Баҳодур Искандаров бунёд шуда, барои корҳои сохтмонӣ 300 ҳазор сомонӣ сарф гардидааст. 

Раиси вилоят дар маросими ифтитоҳи иншоот гуфт, ки баҳри амалӣ намудани дастуру ҳидоятҳои Сарвари давлат оид ба рушди соҳаи варзиш дар самти сохтмони толорҳо ва майдончаҳои варзиш мунтазам тадбирҳои зарурӣ андешида мешаванд.

Иттиллоъ доданд, ки имрӯзҳо дар шаҳру ноҳияҳои вилоят 2673 иншооти варзиш, аз ҷумла 46 варзишгоҳ, 1845 майдончаи варзиш, 567 толор, 34 ҳавзи шиноварӣ ва 181 маҷмааю иншооти махсуси варзишӣ фаъолият доранд. 

Инчунин, раиси вилоят ба мумфаршкунии роҳи кӯчаи ба номи В. В. Куйбишеви маркази шаҳр оғоз бахшида, барои бо сифати баланд ба итмом расондани корҳо ба масъулон супориш дод.

- Масофаи роҳи мумфаршаванда 800 метрро ташкил дода, паҳноии роҳ 6 метр мебошад. Роҳи мазкур бо маблағгузории мақомоти иҷроияи ҳокимияти давлатии шаҳр ва сокинони кӯча мумфарш мегардад. Корҳои мумфаршкунӣ аз ҷониби Муассисаи давлатии «Идораи хоҷагии роҳҳои автомобилгарди шаҳри Конибодом» ба анҷом расонда мешавад, - гуфт М. Юнусов.

Мақомоти иҷроияи ҳокимияти давлатии шаҳри Конибодом барои таъмини рушди устувори соҳаҳои хоҷагии халқи шаҳр чораҳои заруриро амалӣ намуда, кӯшишу ғайрати худро баҳри бо дастовардҳои назаррас истиқбол гирифтани Ҷашни 30 - солагии Истиқлолияти давлатии Ҷумҳурии Тоҷикистон равона хоҳад кард.