Дар доираи чорабиниҳои асосии раёсати Ҷумҳурии Тоҷикистон дар Созмони ҳамкории Шанхай 6 августи соли ҷорӣ дар шаҳри Душанбе Машварати ҳаштуми вазирони адлияи кишварҳои узви созмон дар шакли маҷозӣ баргузор гардид. 

Дар машаварат, ки таҳти раисии Музаффар Ашӯриён, вазири адлияи Ҷумҳурии Тоҷикистон, сурат гирифт, вазирон ва роҳбарони мақомоти адлияи давлатҳои узв, аз ҷумла Федератсияи Россия, Ҷумҳурии Мардумии Чин, Ҷумҳурии Исломии Покистон, ҷумҳуриҳои Ӯзбекистон, Ҳиндустон, Қазоқистон, Қирғизистон ва котиботи СҲШ иштирок доштанд. 

Роҳбарони мақомоти адлияи давлатҳои узви Созмони ҳамкории Шанхай дар ҷараёни нишасти онлайнӣ ба вусъат бахшидани ислоҳоти ҳуқуқӣ, таҳкими волоияти қонун, таъмини ҳуқуқу озодиҳои шаҳрвандон, баланд бардоштани сатҳи тахассусии кормандони соҳа, табодули таҷриба миёни вазоратҳои адлия вобаста ба масъалаҳое, ки манфиатҳои мутақобилан судмандро ба танзим медароранд таваҷҷуҳи махсус зоҳир намуданд. Ҳамчунин, расондани ёрии ҳуқуқии ройгон ба шаҳрвандон, нақши вазоратҳои адлия дар мубориза бо коррупсия ва истифодаи таҷрибаи ҳамдигарӣ дар ин самт, танзими қонунии мубориза ва пешгирии коронавирус дар давраи пандемия, муносибатҳои ҳуқуқӣ вобаста ба парвандаҳои гражданӣ низ аз ҷумлаи мавзӯъҳои меҳварии Машварати ҳаштуми вазирони адлияи кишварҳои аъзои СҲШ буд. 

Вазири адлияи Ҷумҳурии Тоҷикистон аз иштироки фаъол, гуфтугӯ ва таклифҳои судманди роҳбарони мақомоти адлияи кишварҳои аъзои СҲШ ҷиҳати вусъат бахшидани ҳамкориҳо дар соҳаи ҳуқуқ ва адлия истиқбол намуда, изҳори бовар намуд, ки минбаъд низ ҳамкориҳо дар доираи созмон сатҳу сифати нав касб хоҳанд кард.

Иштирокчиёни машварат ҳангоми суханрониҳои худ, ба нақши Тоҷикистон дар таҳкими фаъолият ва баланд бардоштани эътибори СҲШ, раёсати муваффақона ва ба роҳ мондани чорабиниҳои судманд баҳои баланд доданд. Зимнан, изҳори умед карда шуд, ки Ҷашни 20 - солагии Созмони ҳамкории Шанхай, ки ба давраи раёсати Ҷумҳурии Тоҷикистон рост омад, бо кушоиши саҳифаҳои нав дар таърихи ин созмони бонуфузи байналмилалӣ таҷлил хоҳад шуд.

Дар охири нишаст оид ба натиҷаҳои Машварати ҳаштуми вазирони адлияи давлатҳои узви Созмони ҳамкории Шанхай изҳороти муштарак қабул гардид.

 

Фирӯз РАҲМОНИЁН, «Ҷумҳурият»