Дар доираи амалисозии лоиҳаи «Корвони саломатӣ», ки дар асоси Созишномаи грантӣ байни Ҳукумати Ҷумҳурии Тоҷикистон ва Бонки Авруосиёгии Рушд аз тарафи Маҷлиси намояндагони Маҷлиси Олии Ҷумҳурии Тоҷикистон соли 2019 тасдиқ шудааст, дар Маҷмааи тандурустии  “Истиқлол” маросими расмии супурдани маҷмӯи нақлиёти сайёри тиббӣ баргузор шуд.

Дар маросими қабули нақлиётҳои махсуси сайёр вазири тандурустӣ ва ҳифзи иҷтимоии аҳолӣ Ҷамолиддин Абдуллозода, иҷрокунандаи директори блоки лоиҳавии Фонди Авруосиёгии стабилизатсия ва рушд Андрей Широков, намояндагони вазоратҳои корҳои хориҷӣ ва молияи Тоҷикистон ва Сафорати Федератсияи Россия дар Тоҷикистон иштирок намуданд.

Ба иттилои маркази матбуоти Вазорати тандурустӣ ва ҳифзи иҷтимоӣ, Ҷамолиддин Абдуллозода аз номи Ҳукумати Ҷумҳурии Тоҷикистон ба шарикони рушд ҷиҳати дастгирии пайвастаи соҳа изҳори миннатдорӣ баён намуда, иброз дошт, ки дастрасии чунин маҷмӯи нақлиёти сайёри тиббӣ дар самти беҳтар намудани сатҳ ва сифати хизматрасонии тиббӣ ба аҳолии мамлакат нақши муҳим хоҳанд бозид.

Тавре иттилоъ дода шуд, нақлиётҳои махсуси сайёр аз чор модул, аз ҷумла таҷҳизоти рентгенӣ, ташхисӣ, стомотологӣ ва дигар лавозимоти зарурии тиббӣ иборат аст. Дар шароити кӯҳистон чунин нақлиётҳои муосири сайёр метавонанд мушкили беморонро осон намоянд ва онҳоро ба ташхис фаро бигиранд.

Дар раванди татбиқи лоиҳа ҷалби кормандони беморхонаҳои клиникии вилоятҳои Хатлону Суғд ҷиҳати гузарондани муоинаи тиббӣ пешбинӣ шуда, дар қисмати мазкур таъсиси шуъбаи хизматрасонии сайёри мобилӣ дар назди беморхонаҳои клиникии вилоятии вилоятҳои Хатлону Суғд дар назар аст.

Дар доираи татбиқи лоиҳа истифодаи таҷҳизоти дохилимобилӣ ба миён омада, бо назардошти ин, оид ба истифода ва нигоҳубини он барои кормандони шуъбаи хизматрасонии сайёри мобилӣ дар назди беморхонаҳои клиникии вилоятии Хатлону Суғд, ҳамзамон, барои мутахассисони муассисаҳои кумаки аввалияи тиббию санитарӣ, бунгоҳҳои тиббии ноҳияҳои дурдасти минтақаҳои таҷрибавӣ оид ба масъалаҳои марбут ба беҳтаркунии хизматрасонӣ, даврҳои омӯзишӣ гузаронда мешаванд.

Маблағи умумии лоиҳа 2, 06 миллион доллари ИМА-ро ташкил дода, аз он 2 миллион доллар маблағҳои грантии Фонди Авруосиёгии стабилизатсия ва рушд ва 60 ҳазор доллар ҳамчун саҳми Ҳукумати Ҷумҳурии Тоҷикистон аз ҳисоби маблағҳои пешбинишудаи соҳаи тандурустӣ мебошад.

 

Нигина РАҲМОН, «Ҷумҳурият»