Мир 24. Президенти Афғонистон Ашраф Ғанӣ изҳор дошт, ки барои пешгирӣ аз хунрезӣ маҷбур шудааст истеъфо диҳад ва ҷумҳуриро тарк  намояд. Вай дар ин бора дар саҳифаи фейсбукиаш навиштааст.

Ба гуфтаи Ғанӣ, «Толибон» ҳамла омода мекарданд. Бо мақсади пешгирӣ аз хунрезӣ ва ҳалокат, ӯ тасмим гирифт, то кишварро, ки «тамоми умри худро ба он бахшидааст» тарк кунад.

«Агар ҳанӯз ҳам ҳамватанони бешумор мебуданд ва онҳо бо харобшавии шаҳри Кобул рӯ ба рӯ мешуданд, он гоҳ шумораи зиёди қурбониён дар ин шаҳри шашмиллионнафара ба вуҷуд меомад. Барои роҳ надодан ба хунрезӣ, ман фикр кардам, ки тарк кардани Кобул беҳтар аст”, - гуфта мешавад дар паём.

Ғанӣ, ҳамчунин, таъкид кард, ки аз ин ба баъд «Толибон» барои "шараф, моликият ва ҳифз" - и мардуми Афғонистон масъуланд.

 

Теъдоди қурбониёни заминларзаи Ҳаити меафзояд 

Известия. Шумораи қурбониёни заминларзаи рӯзи шанбе дар Ҳаити баамаломада ба 1297 нафар расид. Дар ин бора  агентии  France - Presse   бо такя ба маълумоти шуъбаи мудофиаи шаҳрвандии ҷумҳурӣ хабар дод.

Ҳадди ақал 5,7 ҳазор нафар маҷрӯҳ шуд, ки 3,2 ҳазор нафари онҳо дар беморхона бистарӣ шуданд. Ҷустуҷӯи одамон аз зери харобаҳо идома дорад.

Созмони Милали Муттаҳид гуфтааст, ки аз талошҳои ҳукумати Ҳаити барои ёрӣ расондан ба осебдидагони зилзилаи ахир ҷонибдорӣ мекунад ва омода аст ёрии минбаъдаро расонад.

 

 

Россия ҳанӯз ҳукумати «Толибон»-ро эътироф намекунад, аммо…

Мир 24. Россия омода аст бо «Толибон» ҳамкорӣ намояд, аммо ҳоло ҳукумати онро эътироф намекунад. Дар ин бора ба «Вести» намояндаи махсуси Президенти Федератсияи Россия дар Афғонистон, директори департаменти дуюми Осиё Замир Кобулов хабар дод.

Россия ният дорад бо роҳбари дафтари сиёсии «Толибон» Абдулғанӣ Бародар дар Доҳа мулоқот кунад. «Ҳоло мо бо Мулло Бародар дар Доҳа суҳбат хоҳем кард. Минбаъд хоҳем дид, ки ин чӣ гуна хоҳад буд», - гуфт Кобулов.

Ӯ зикр кард, ки Федератсияи Россия бо ҳар ду ҷониби мухолиф дар Афғонистон муносибатҳои хуб дорад.

«Аз ин рӯ, мо беташвишем», - хулоса кард ӯ.

 

 

Изҳороти сиёсатмадори олмонӣ оид ба «Маҷрои шимолӣ – 2»   

РТ. Агар Ҳукумати тозаинтихоби Олмон тасмим гирад, ки аз лоиҳаи «Маҷрои шимолӣ-2» даст мекашад, ин боиси марги Олмон ҳамчун як кишвари пешрафтаи саноатӣ мешавад, - гуфт раиси ҳизби «Алтернативӣ барои Олмон» Йорг Мойтен. 

Дар мусоҳиба бо «Известия» ӯ зикр кард, ки беасос рад кардани Канслери феълии Олмон Ангела Меркел бо мақсадҳои осоишта истифода бурдани энергияи атомӣ кишварро ба вазъи буҳрони соҳа оварда расонд.

«Ҳамин тариқ, ба андешаи ман, вазъияте ба вуҷуд омадааст, ки дар он  «Маҷрои шимолӣ-2» барои чунин як кишвари аз ҷиҳати саноатӣ пешрафта, ба монанди Олмон, ивазнашаванда шудааст», - таъкид кард сиёсатмадор.