Лента. ру. Созмони  Аҳдномаи амнияти дастаҷамъӣ (СААД) ба тамрини низомӣ дар марз бо Афғонистон омодагӣ мебинад. Дар ин бора дабири кулли СААД Станислав Зас хабар дод.

Неруҳои даста-ҷамъии созмон омодагиро ба машқҳо, ки моҳҳои наздик баргузор мешаванд, шуруъ кардаанд. Гуфта мешавад, ки машқҳо дар наздикии марзи Тоҷикистону Афғонистон баргузор мешаванд.

Қаблан намояндаи махсуси Президенти Россия дар Афғонистон,  директори департаменти дуюми осиёии Вазорати корҳои хориҷии Россия Замир Кобулов гуфта буд, ки Маскав дар сурати тағйири ғайричашмдошти рӯйдодҳо дар ҳудуди Афғонистон нақшаи амали эҳтиётӣ дорад.

 

 

Чин умедвор аст, ки “Толибон” ҷангро дар Афғонистон хотима медиҳад

ТАСС. Ҳукуматдорони Чин умедворанд, ки ҳаракати радикалии «Толибон» ваъдаҳои худро дар бораи қатъи амалиётҳои ҷангӣ ва амалҳои террористӣ дар Афғонистон иҷро хоҳанд кард. Дар ин бора  намояндаи махсуси Вазорати корҳои хориҷии Чин Хуа Чунин хабар дод.

"Мо ба изҳороти «Толибон» таваҷҷуҳ кардем ва умедворем, ки ниҳоят ҷанг дар Афғонистон хотима меёбад. Умедворем, ки ин ваъдаҳо иҷро хоҳанд шуд", - гуфт ӯ дар  нишасти матбуотӣ.

Хуа ёдовар шуд, ки ҷанг дар Афғонистон чанд даҳсола идома дорад. Вай, ҳамчунин, зикр кард, ки сарнавишти ин кишварро бояд мардуми Афғонистон ҳал кунад.

"Мо умедворем, ки як ҳукумати таҳам-мулпазирии исломӣ ташкил карда мешавад ва «Толибон» амнияти мардуми осоишта ва дипломатҳои хориҷиро таъмин хоҳанд кард. Зарур аст, ки ҳар гуна зуҳуроти терроризм бояд хотима ёбад", - афзуд мансабдор. 

 

 

Тақрибан 110 сарвари давлатҳо дар Маҷмааи умумии СММ суханронӣ мекунад 

Известия. Интизор меравад, ки дар ҳафтаи сатҳи олии Маҷмааи умумии СММ тақрибан 110 сарвари давлат, беш аз 50  роҳбари ҳукумат ва зиёда аз 20 вазири корҳои хориҷӣ баромад мекунанд. Дар ин бора рӯзи 16 август АИР «Новости» бо такя ба рӯйхати пешакии суханварон хабар дод. 

Тавре интизор меравад, 21 сентябр, дар қатори дигарон, роҳбарони Бразилия, ИМА, Эрон, Туркия, Ҷумҳурии Корея, Ӯзбекистон, Миср, Латвия, Мексика, Лаҳистон дар ҷаласа суханронӣ хоҳанд кард. Рӯзи 22 сентябр раҳбарони Тунис, Молдова, Эстония, Венесуэла, Муғулистон, Украина, Ветнам ва Афғонистон сухан мегӯянд. 23 сентябр суханронии раҳбарони Африқои Ҷанубӣ, Куба, Марокаш, Тоҷикистон, Озарбойҷон, Либия, Судони Ҷанубӣ ба нақша гирифта шудааст. 

 

Баррасии вазъи Афғонистон дар Иттиҳоди Аврупо ва НАТО

Лента. ру. Намояндаи олии Иттиҳоди Аврупо оид ба корҳои хориҷӣ ва сиёсати амниятӣ Хосеп Боррелл бо Дабири кулли НАТО Йенс Столтенберг суҳбати телефонӣ анҷом дод. Онҳо вазъи Афғонистонро баррасӣ карданд. Дар ин бора Боррелл дар саҳифаи Твиттераш хабар дод.

"Мо дар як суҳбати телефонӣ бо Дабири кулли НАТО Йенс Столтенберг ҳодисаҳои ахир ва вазъ дар Афғонистон, аз ҷумла дастрасӣ ба фурудгоҳи Кобул ва амалиёти ба ҷойҳои бехавф кӯчонданро, баррасӣ кардем", - навиштааст Боррелл.

Қаблан хабар дода шуда буд, ки дар ошӯбҳо дар Фурудгоҳи байналмилалии Кобул  пас аз ишғоли   ҷангиёни радикалии «Толибон»  камаш ҳафт нафар кушта шуд.

 

 

Макрон аз ҳамкории Россия, ИМА ва Аврупо дар масъалаи Афғонистон сухан гуфт

Газета.ру. Президенти Фаронса Эммануэл Макрон гуфтааст, ки Фаронса омода аст ба ҳамкории Россия, ИМА ва ИА барои ҳалли вазъ дар Афғонистон фаъолона мусоидат кунад.

«Бозгашт ба субот бояд бо кори фаъоли сиёсӣ ва дипломатӣ дар Шурои Амнияти СММ сурат гирад. Афғонистон набояд мисли пештара ба паноҳгоҳи террористон табдил ёбад. Ин шарте мебошад барои сулҳ ва субот дар ҷаҳон дар муқобили душмани умумӣ - терроризм ва онҳое, ки онро дастгирӣ мекунанд. Дар робита ба ин мо ҳама корро мекунем, то Россия, ИМА ва Аврупо ба таври муассир ҳамкорӣ кунанд, зеро манфиатҳо мувофиқат мекунанд", - гуфт Макрон дар паёми телевизионӣ.