Бахшида ба Ҷашни 30 - солагии Истиқлолияти давлатии Ҷумҳурии Тоҷикистон ва эълони Солҳои рушди деҳот, сайёҳӣ ва ҳунарҳои мардумӣ дар Осорхонаи миллӣ конфронси илмӣ–назариявии «Либоси миллӣ – ёдгоре аз ниёгон» баргузор гардид.   Намоиши вобаста ба он ташкилшуда то 1 сентябр идома меёбад.

Тавре Фаридун Кенҷаев, сардори шуъбаи экскурсионӣ ва оммавии  осорхона, иттилоъ дод, дар ифтитоҳи намоиш намояндагони Осорхонаи Гимеи шаҳри Парижи Фаронса, Вазорати фарҳанг, кумитаҳои рушди сайёҳӣ, кор бо занон ва оилаи назди Ҳукумати Ҷумҳурии Тоҷикистон, Академияи миллии илмҳои Тоҷикистон, Донишгоҳи миллии Тоҷикистон, Донишкадаи давлатии санъати тасвирӣ ва дизайни Тоҷикистон, Осорхонаи мардумшиносии АМИТ ва дигар олимону донишмандони соҳа иштирок ва суханронӣ намуданд.

Дар намоиш аз фонди Осорхонаи миллии Тоҷикистон зиёда аз 600 намунаи гуногуни либоси тоҷикон, аз қабили куртаҳои чакан, атлас, адрас, сарбанд, рӯймол, миёнбанд, матоъҳои читӣ, шерозаҳо, тӯмордонҳо, каллапӯшу кулоҳ, тоқӣ, пойафзол, кафши чӯбину чармин, маҳсӣ ва дигар ашёҳои ороишу зебу зинати миллӣ (ороишоти занона: ангуштарин, дастмона, қулфи гиребон, гӯшвор, тоҷ), ки инъикосгари таъриху фарҳанг, расму оин ва ҳунарҳои мардумии ниёгони тоҷикон мебошанд, ба маъраз гузошта шудаанд.

- Миллати тоҷик дар таърихи тамаддуни башарӣ ҳамчун миллати фарҳангсолору фарҳангсоз муаррифӣ гардида, бо забону адабиёт, урфу одат, расму оин ва анъанаҳои некаш шинохта шудааст. Яке аз арзишҳои асосии таҷассумгари фарҳанги миллӣ, ҳувияти миллӣ ва ифтихори халқи тоҷик – ин  либос ба шумор меравад, -  гуфт Аҳлиддин Ибодуллозода, директори Осорхонаи миллии Тоҷикистон.

Дар ҳамоиш доир ба таъриху пайдоиш, ташаккул ва дигар вижагиҳои хоси либоси миллӣ доираи васеи олимон, муаррихон ва муҳаққиқон бо маърузаҳои пурмуҳтаво суханронӣ намуданд.

 

Лола РИЗОӢ,  “Ҷумҳурият”