Бо иштироки Сарвазири мамлакат Қоҳир Расулзода бинои факултети фармасевтии Донишгоҳи давлатии тиббии Тоҷикистон ба номи Абуалӣ ибни Сино пас аз таъмири пурра ва муҷаҳҳазгардонӣ мавриди истифода қарор гирифт.

Бо ифтитоҳи иншоот дар самти таҳсилоти олӣ, рушди илм, ҷорӣ намудани технологияи нави омӯзиш, инкишофи малакаи касбӣ ва роҳандозии усулҳои банақшагирии стратегӣ имкони беҳтар фароҳам оварда шуд.

 

 

Ҷаласаи сеюми маъмурияти  роҳҳои оҳани кишварҳои узви СҲШ

Таҳти раёсати сардори КВД «Роҳи оҳани Тоҷикистон» Комил Мирзоалӣ тариқи видеоконфронс ҷаласаи сеюми роҳбарони идораҳои роҳи оҳани кишварҳои узви Созмони ҳамкории Шанхай баргузор гардид.

Тавре Вазорати нақлиёт хабар дод, ҷонибҳо дар робита ба паҳншавии коронавирус ва боздоштани ҳамлу нақли мусофирон тавассути роҳи оҳан дар хатсайрҳои байналмилалӣ дар  ҳудуди кишварҳои узви созмон нигаронӣ карданд.

Тарафҳо вобаста ба зарурати андешидани тадбирҳои муштарак оид ба рушди ҳамбастагии инфрасохтори роҳи оҳан, таҳияи пешниҳодҳо оид ба муттаҳидсозии сиёсат ва стратегияҳои нақшаҳои рушд, навовариҳои техникӣ дар нақлиёти роҳи оҳан ва корҳои муштараки тадқиқотӣ ба мувофиқа расида, оид ба ин масоил санади ҳамкорӣ ба имзо расонданд.

 

 

Намоиш - фурӯши китоб дар шаҳри Душанбе

Имрӯз дар “Боғи устод Рӯдакӣ” - и шаҳри Душанбе бахшида ба 30-солагии Истиқлолияти давлатӣ ва Озмуни ҷумҳуриявии «Фурӯғи субҳи доноӣ китоб аст» зери унвони «Китоби Душанбе» намоиш - фурӯши бузурги китоб бо тахфифи 30 дарсад баргузор мегардад.

Дар ин бора Вазорати фарҳанг иттилоъ дод. Дар намоиш - фурӯш ноширони ватанӣ китобҳои тозанашрро манзури сокинон ва меҳмонони пойтахт мегардонанд.

 

 

Боз 14 оилаи аз офати табиат  зарардида соҳиби хона шуд

Бо ҳузури муовини аввали раиси вилояти Хатлон Амонулло Салимзода дар ноҳияи Абдураҳмони Ҷомӣ калиди 14 манзили навбунёд ба соҳибонашон, ки бар асари офати табиии моҳи май бехона монда буданд, дар вазъи тантанавӣ супурда шуд.

Бунёди шаҳраки нав бо дастгирии Ҳукумати Ҷумҳурии Тоҷикистон, зери сиёсати халқпарваронаи Пешвои миллат муҳтарам Эмомалӣ Раҳмон дар фурсати кӯтоҳ амалӣ гардида, сокинони аз офати табиӣ зарардидаи Ҷамоати деҳоти Навобод бо манзилҳои замонавӣ ва тамоми ҷиҳози рӯзгор таъмин шуданд.

 

 

COVID - 19. Дар Тоҷикистон беш  аз 98 дарсади маризон шифо ёфтанд

Шабонарӯзи охир дар Тоҷикистон 51 ҳолати гирифторшавии шаҳрвандон ба бемории COVID-19 ба қайд гирифта шуда, 81 нафар табобат ёфт, - хабар медиҳад Вазорати тандурустӣ ва ҳифзи иҷтимоии аҳолӣ.

Дар маҷмуъ, аз аввали бақайдгирӣ то 19 август дар кишвар 16326 нафар гирифтори COVID-19 муайян гардида, аз ин шумора то санаи зикргардида 16053 кас (98,3%) шифо ёфт. Ҳамзамон, бар асари бемории мазкур 124 нафар фавтид.