Сарвазири Ҷумҳурии Исломии Покистон Имрон Хон ба шахсияти Президенти Ҷумҳурии Тоҷикистон муҳтарам Эмомалӣ Раҳмон эҳтироми хос доранд. Ман бо супориши вижаи ҷаноби Сарвазир ба Тоҷикистон омадам, то мавқеи Ҷумҳурии Исломии Покистонро дар мавриди ба эътидол овардани вазъ дар Ҷумҳурии Исломии Афғонистон рӯшан созам. Зеро вазъи имрӯзаи Афғонистон метавонад ба амнияти кишварҳои минтақа низ таъсири манфӣ расонад.

 

Ин матлабро Маҳдум Шоҳ Маҳмуд Қурейшӣ, вазири корҳои хориҷии Ҷумҳурии Исломии Покистон, баъд аз мулоқот бо Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳузури хабарнигорон баён дошт. Номбурда натиҷаҳои мулоқоташ бо Сарвари давлати моро самараноку судманд арзёбӣ намуда, таъкид кард, ки вобаста ба ҳалли қазияи Афғонистон истифода аз таҷрибаи сулҳофарии Президенти Ҷумҳурии Тоҷикистон ба манфиати кор хоҳад буд. Аз ин рӯ, ман тавсияҳои судманди ҷаноби Президентро гирифтам, ҳамзамон, нигарониҳояшонро ба ҷониби Покистон хоҳам расонд.    

- Бо назардошти таъсири вазъи Афғонистон ба кишварҳои минтақа, ҳамаи ҷонибҳои манфиатдор бояд сари мизи гуфтугӯ нишинанд ва тарҳи ояндаи таъмини сулҳу субот, ҳалли мушкилоти сиёсиву амниятии ин кишварро баррасӣ намоянд. Ҷумҳурии Исломии Покистон ҷонибдори таъсиси Ҳукумати фарогири инклюзивие дар Афғонистон аст, ки намояндагони ҳамаи қавмҳо тавонанд дар он иштироки фаъол дошта бошанд. Зеро дар Афғонистон ақаллиятҳои миллии гуногун зиндагӣ мекунанд, ки ҳар кадомашон дорои манфиатҳои худ ҳастанд, - иброз дошт Маҳдум Шоҳ Маҳмуд Қурейшӣ.

 

Фирӯз РАҲМОНИЁН, «Ҷумҳурият»