Таҷриба кайҳо собит намудааст, ки дар меҳвари таваҷҷуҳ қарор додани сиёсати роҳсозӣ заминаҳои рушди иқтисодиро фароҳам намуда, омили асосии таъмини пешрафти ҷомеа мегардад. Аз ин рӯ, Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар аввалин фурсатҳои фаро расидани марҳилаи эъмори давлати миллӣ ва бозсозии иқтисоди кишвар ба сохтмону таҷдиди роҳу нақбҳо афзалият доданд.        

Ҳоло агар комёбиву дастовардҳои беназири замони Истиқлолияти давлатиро баршуморем, сохтмону таҷдиди ҳазорҳо километр роҳу шоҳроҳҳои мутобиқ ба меъёрҳои байналмилалӣ дар канори муҳимтарини онҳо қарор мегиранд. Зеро бо рӯйи кор омадани барномаҳои давлатии роҳсозӣ, мо на танҳо ба истифода аз роҳҳои босифату замонавӣ даст ёфтем, балки назарияи мутахассисон ва имконоти фаннии соҳа низ тақвият ёфт. Муҳимтар аз ҳама, татбиқи босамару босифати лоиҳаҳои бунёди роҳҳои оҳану мошин, нақбу пулҳо барои расидан ба яке аз ҳадафҳои стратегии давлат - баромадан аз бунбасти коммуникатсионӣ комилан мусоидат намуда, ба рушди тиҷорату савдо, содироти молу маҳсулот ба хориҷи кишвар ва баланд бардоштани сифати зиндагии мардум таъсири мусбат расонд.

Имрӯз бо баҳрабардорӣ аз файзу нусрати сиёсати роҳсозии Ҳукумати ҷумҳурӣ суханони Пешвои муаззами миллат ба ёд меоянд, ки гуфта буданд: «Бо бунёди шоҳроҳҳо ва нақбу пулҳои замонавӣ мо ният дорем, ки дар ояндаи наздик фаъолияти минтақаҳои озоди иқтисодӣ ва бозорҳои наздисарҳадиро васеъ ба роҳ монда, бо ин роҳ низ афзудани иқтидори иқтисодӣ ва беҳтар шудани сатҳу сифати зиндагии мардуми Тоҷикистонро таъмин намоем».

Воқеан, бо гузашти солҳо, мо ба дарки ин ҳақиқат расидем, ки Президенти маҳбуби кишвар дар пайи ҳар амал ва иқдомоти дурбинонаи хеш, назири сохтмони роҳҳои замонавӣ зиндагии шоистаи мардумро аз даҳсолаҳо пеш тарҳрезиву замина гузоштаанд. 

Дар ин робита, қобили зикр аст, ки бо дастгирӣ ва роҳнамоии Сарвари давлат дар баробари татбиқи лоиҳаҳои ҳазорҳо километр роҳҳои автомобилгарди аҳамияти минтақавию байналмилалидошта, нақбу пулҳо дар пойтахти Ватани азизамон – шаҳри Душанбе роҳҳои муосири сесатҳа (эстакадаҳо) бунёд ёфта, ҳаракати озодонаи нақлиёту бехатарии пиёдагардон таъмин гардид. Ин таҷриба, ки дар доираи амалишавии лоиҳаи «Беҳтар намудани ҳолати роҳи минтақавии Душанбе - Турсунзода, қитъаи роҳ аз буриши хиёбони Сино бо хиёбони Исмоили Сомонӣ то дарвозаи ғарбии шаҳри Душанбе» ҳосил шуд, ба намои шаҳри Душанбе симои нав бахшид. Аз сӯйи дигар, чунин роҳҳои ободу замонавӣ дар чашми меҳмонони хориҷӣ бозгӯйи маданият ва мизони рушду таррақиёти кишвар хоҳанд буд, ки ҳама аз файзи Истиқлолияти давлатӣ ва сиёсати хирадмандонаи Пешвои муаззами миллат аст. 

 

 

Нуралӣ  АРАБЗОДА, 

директори иҷроияи Маркази татбиқи лоиҳаҳои таҷдиди роҳҳо