Ҷумҳурии Исломии Афғонистонро ишғол намудани ҳаракати радикалии «Толибон»  ва пайомадҳои ташвишбори он - аз кишвар фирор кардани   ҳазорҳо сокинони он, қатлу куштори одамони бегуноҳ, ҷабру зулм нисбат ба занону духтарон, маҳдуд намудани ҳуқуқҳои  онҳо, аз Кобул берун шудани намояндагони корпусҳои дипломатии як қатор кишварҳо, ҳодисаҳои хунин ва ташвишбор дар фурудгоҳи Кобул ҷомеаи ҷаҳониро ба ташвиш овардааст. Аммо дар ростои   мушкили сиёсиву амниятии Афғонистон сарварони бисёр кишварҳо  ҳанӯз мавқеи устувору қатъии ҳукуматҳояшонро эълон накардаанд. 

 

Боиси ифтихор аст, ки Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  зимни мулоқот бо вазири корҳои хориҷии Ҷумҳурии Исломии Покистон Маҳдум Шоҳ Маҳмуд Қурейшӣ бо қатъият изҳор намуданд, ки Тоҷикистон ҳама гуна намуди беқонунӣ, зуҳуроти куштор, ғоратгарӣ ва таъқибу зулмро алайҳи мардуми Афғонистон, махсусан тоҷикон, ӯзбекон ва дигар ақаллиятҳои миллӣ қатъиян маҳкум менамояд.

Президенти кишвар таъкид намуданд, ки барои ҳалли фаврии мушкилоти сиёсиву амниятии кишвари ҳамсоя бояд ҳар чи тезтар як ҳукумати фарогири инклюзивӣ бо иштироки ҳамаи ақаллиятҳои миллӣ, пеш аз ҳама, тоҷикони Афғонистон, ки зиёда аз 46 фоизи мардуми ин кишварро ташкил медиҳанд, таъсис дода шавад. Ин дар ҳолест, ки ҳаракати «Толибон» шурои роҳбарӣ иборат аз дувоздаҳ нафарро таъсис дод, ки дар ҳайати он, асосан, паштузабононанд.

- Тоҷикистон ҳеҷ гуна ҳукумати дигарро, ки дар ин кишвар бо роҳи зулму таъқиб, бе дарназардошти мавқеи кулли мардуми Афғонистон, бахусус тамоми ақаллиятҳои миллии он, таъсис дода мешавад, эътироф нахоҳад кард, - зикр намуданд Сарвари маҳбуби давлатамон. Таъкиди Пешвои муаззами миллат дар ин бора, ки тоҷикон дар ҳукумати ояндаи  Афғонистон ҷойгоҳи шоиста дошта бошанд, далели олии пуштибонӣ аз  миллат, нангу номус ва ҳифзу ҳимояи тоҷикон ва баёнгари олии Пешвои тамоми тоҷикони ҷаҳон будани Президенти  Ҷумҳурии Тоҷикистони соҳибистиқлол ва озоду демократӣ муҳтарам Эмомалӣ Раҳмон мебошад. Ин  сазовори ҳама гуна таҳсин ва ифтихор аст. 

Сарвари давлат дар ин мулоқот азму иродаи миллати тоҷик ва тоҷикистониёнро изҳор намуданд. Он ҷавобгӯйи орзуву армони ҳамаи мо, мақсади  ягона ва устувори тамоми тоҷикистониён аст. Мавқеи дуруст, оқилонаю хирадмандонаи Пешвои муаззами миллатро дар масъалаи ҳалли низоъ дар Афғонистон, тақдири миллати тоҷик ва ақаллиятҳои миллиро дар ин кишвар табрик мегӯем ва  аз дилу ҷон дастгирӣ мекунем.

 

Луқмон ҚУРБОН, 

сармуҳаррири рӯзномаи «Зарафшон»