ФИЛМИ «ҶОМӢ ВА НАВОӢ»-РО БА НАВОР МЕГИРАНД

Дар Муассисаи давлатии «Тоҷикфилм» аз сафари кории ҳайати Ҷумҳурии Тоҷикистон ба Ӯзбекистон натиҷабардорӣ шуд.

Сафар дар ҳайати муовини якуми директори «Тоҷикфилм» Толиб Ғайбуллозода, олимон Шодимуҳаммад Сӯфизода, Муҳрид-дин Низомӣ ва раиси Иттифоқи синамогарони Тоҷикистон Сафар Ҳақдодов сурат гирифт.  Дар вохӯриву суҳбатҳо ба анҷоми корҳои муқаддамотӣ оид ба иншои филмномаи «Ҷомӣ ва Навоӣ», масъалаҳои васеи вобаста ба ин ду шахсияти бузурги таърихи ду миллати ҳамҷавор, дӯстии бегазанди тоҷикону ӯзбекон ва инъикоси он дар ин филми ҳунарӣ таваҷҷуҳи хоса зоҳир гарид.

Қарор дода шуд, ки дар муҳлати муқар-раршуда филмномаро аз ҷониби Ҷумҳурии Тоҷикистон Сафар Ҳақдодов бо маслиҳату машварати олимони тоҷик таҳия хоҳад кард.

 

 

ГИРОМИДОШТИ СОТИМ УЛУҒЗОДА

Дар Иттифоқи нависандагони Тоҷи-кистон ёдбуди Нависандаи халқии Тоҷи-кистон Сотим Улуғзода баргузор гардид.

Адибони маъруф Абдулҳамид Самад, Аскар Ҳаким ва Гулрухсори Сафӣ аз хидматҳои шоистаи ин шахсият дар таъриху адабиёти тоҷик гуфта, изҳор доштанд: «Роману намоишномаҳои таърихии «Ривояти суғдӣ», «Фирдавсӣ», «Восеъ» барои ташаккули ҳувияти миллӣ ва бедории мардум нақши бузург доранд». Ҳачунин, пешниҳод гардид, ки барои арҷгузории ранҷҳои адабии нависанда мунтахаби осораш рӯйи чоп ояд.

 

 

“ГУЛНАЗАРНОМА” НАШР ШУД

Китоби адабиётшинос ва тарҷумон, устоди ДДЗТ ба номи Сотим Улуғзода Абдурашид Самадов таҳти унвони “Гулназарнома” ба чоп расид. Ин китобро Абдурашид Самадов подоши “дӯстии 59-сола бо Гулназар”, “меҳру муҳаббат ва самимияти ӯ” арзёбӣ кардааст.  

Китоб аз силсилаи мақолаҳо, ёддошту хотирот, суҳбатҳо ва номаҳо иборат аст. Дар бахши мақолаҳо перомуни эҷодиёти Гулназар тааммул шуда, дар бахши хотираҳо лаҳзаҳои рангини зиндагии шоир сабт аст.

40 номаи Гулназар ба муаллиф аз ёди ҷавонии пуршӯр, хизмат дар сафи Қувваҳои мусаллаҳ, фаъолияти якҷояи онҳо дар Афғонистон нақл мекунанд.

 

Бузургмеҳри БАҲОДУР, «Ҷумҳурият»