Лента.ру. Президенти Россия Владимир Путин дар вохӯрӣ бо раҳбарони Ҳукумат гуфт, ки душманони асосии Россия камбизоатӣ, мушкилот дар соҳаи маориф, тандурустӣ ва инфрасохтор мебошанд.   

Сарвари давлат зикр кард, ки баланд бардоштани сатҳи некуаҳволии русҳо муҳим аст, зеро як қисми назарраси аҳолӣ дар ҳоли камбизоатӣ зиндагӣ мекунанд. «Барои мо бо итминони комил гуфтан ин ки мо ба ҳама ҳадафҳо расидем, «ура!» гуфта, фарёд кардан хеле барвақт аст. Душман то ҳол мағлуб нашудааст», - гуфт Путин.

Ӯ илова намуд, ки зарбаи асосӣ ба некуаҳволии шаҳрвандон пандемияи COVID-19 буд.

 

 

Фаронса хостори афзоиши шумораи аъзои Шурои амнияти СММ мебошад

ТАСС. Фаронса афзоиши шумори кишварҳои узви Шурои амнияти Созмони Милали Муттаҳидро зарур мешуморад. Дар ин бора намояндаи расмии Вазорати корҳои хориҷии Фаронса хабар дод.

«Фаронса кайҳо идеяи тавсеаи Шурои амниятро дастгирӣ мекард. Вай ҷонибдори афзоиши ду категорияи аъзои Шурои амният - ҳам доимӣ ва ҳам муваққатӣ аст», - гуфт дипломат. Вай афзуд, ки «дар ин замина Фаронса ташаббуси кишварҳои Гурӯҳи чаҳорро (G4 - Олмон, Бразилия, Ҳиндустон ва Ҷопон), ки ба таъсиси як курсии иловагӣ дар Шурои амният барои як кишвари узви доимӣ нигаронда шудааст, дастгирӣ мекунад».

«Вай, инчунин, аз тавсеаи намояндагии кишварҳои Африқо, аз ҷумла ба ҳайси аъзои доимии Шурои амният пуштибонӣ мекунад», - гуфт намояндаи департаменти дипломатӣ.

 

 

Гутерриш умедвор аст, ки муколама байни Арманистон ва Озарбойҷон идома меёбад

RТ. Дабири кулли Созмони Милали Муттаҳид Антониу Гутерриш изҳори умед кард, ки музокироти мустақими Озарбойҷон ва Арманистон пас аз мулоқоти вазирони корҳои хориҷии ду кишвар дар ҳошияи 76 -умин  Ассамблеяи генералии СММ идома меёбад.

Ӯ, инчунин, афзуд, ки ин талошҳо бахше аз муколамаи васеъ барои расидан ба ҳалли устувори сулҳ хоҳанд буд.

Қаблан Ҷейҳун Байрамов, вазири корҳои хориҷии Озарбойҷон ва ҳамтои армании ӯ Арарат Мирзоян дар Ассамблеяи генералии СММ музокирот анҷом доданд.

 

 

«Толибон» дар Афғонистон тарошидани риш, рафтан ба сартарошхона ва пӯшидани пойафзоли сафедро манъ карданд

Росбалт. Ба мардони афғон «тибқи меъёрҳои ислом» тарошидани риш ва рафтан ба сартарошхонаҳо манъ карда шуд. Ҳаракати «Толибон» дар саросари кишвар чунин фармон содир кардааст, - менависад рӯзномаи Ettelaat.

Дар вилоятҳои Ҳилманд ва Қандаҳор акнун навохтани мусиқӣ низ мамнуъ аст. Илова бар ин, вазири нави  мудофиаи Афғонистон Мавлавӣ Яъқуб ба радикалҳо амр дод, ки селфӣ накунанд, зеро ин «ба амнияти раҳбарияти «Толибон» таҳдид мекунад». Вай тавзеҳ дод, ки аксҳо метавонанд маълумотро дар бораи макон ва фаъолияти аъзои гурӯҳ ифшо кунанд, - менависад The Wall Street Journal.

Дар айни замон, Яъқуб ҷангиёнро барои босуръат рондани нақлиёт ва тақлид ба мӯди Ғарб, аз ҷумла дар шакли мӯйҳои дарози то китф ва пӯшидани пойафзоли сафед сарзаниш кард.