Вазири корҳои хориҷӣ Сироҷиддин Муҳриддин дар чорчӯбаи сафари кории худ ба Ню-Йорк ҷиҳати иштирок дар мубоҳисаҳои умумии иҷлосияи 76-уми Маҷмаи умумии Созмони Милали Муттаҳид бо президенти тозаинтихоби он Абдулло Шоҳид мулоқот кард.

Ҷонибҳо дар чорчӯбаи Маҷмаи умумӣ маҷмуи масъалаҳои ҳамкории Тоҷикистон ва СММ, аз ҷумла бахшҳои амният, иқтисод, иҷтимоӣ, гуманитарию беҳдоштӣ ва обу иқлимро мавриди баррасӣ қарор дода, ба зарурати таҳкими ҳамкориҳои бисёрҷониба таъкид сохтанд.

 

 

Музокироти Тоҷикистон ва Ӯзбекистон оид ба аломатгузории сарҳадҳо

Дар шаҳри Самарқанди Ҷумҳурии Ӯзбекистон вохӯрии навбатии гурӯҳҳои кории ҳайатҳои ҳукуматии Ҷумҳурии Тоҷикистон ва Ҷумҳурии Ӯзбекистон дар Комиссияи муштараки демаркатсионӣ баргузор гашт. Дар музокирот корҳои аломатгузорӣ дар хатти Сарҳади давлатии Тоҷикистону Ӯзбекистон баррасӣ гардиданд.

Тарафҳо натиҷаи корҳои саҳроиро дар хатти Сарҳади давлатии Тоҷикистон ва Ӯзбекистон баррасӣ карда, ба мувофиқа расиданд, ки баҳри омода намудани хатти лоиҳавии демаркатсионӣ корҳоро идома диҳанд. Пас аз анҷоми вохӯрӣ протокол ба имзо расид.

Вохӯрии навбатӣ дар Тоҷикистон баргузор мегардад.

 

 

Густариши ҳамкорӣ бо СҶТ

Муовини якуми вазири тандурустӣ ва ҳифзи иҷтимоии аҳолӣ Ғафур Муҳсинзода бо коршиносони  Миссияи техникии дафтари Созмони ҷаҳонии тандурустӣ дар Аврупо Роберт Пастор, Хосе Хаган ва Рустам Набиев мулоқот намуд. Инчунин, дар вохӯрӣ роҳбари намояндагии Созмони ҷаҳонии тандурустӣ дар Ҷумҳурии Тоҷикистон Виктор Олшавский ва дигар шахсони масъул иштирок доштанд.

Муовини якуми вазири тандурустӣ ва ҳифзи иҷтимоии аҳолӣ аз ҳамкориҳои ниҳод бо дафтари СҶТ дар Аврупо  ёдовар шуда, омодагии вазоратро ҷиҳати тақвияти ҳамкориҳо иброз намуд.

Ҳадаф аз ташрифи коршиносони Миссияи техникии дафтари СҶТ дар Тоҷикистон расондани ёрии техникӣ ба вазорат доир ба арзёбии фарогирии реҷаи эмкунӣ, гузарондани баҳодиҳии сифати маълумотҳо дар соҳаи иммунопрофилактика ва табодули таҷриба бо мутахассисони тоҷик дар ин самт ба шумор меравад.

 

 

Мулоқоти сафирони Тоҷикистон ва Чин дар Россия

Сафири фавқулода ва мухтори Ҷумҳурии Тоҷикистон дар Федератсияи Россия Давлатшоҳ Гулмаҳмадзода бо сафири фавқулода ва мухтори Ҷумҳурии Мардумии Чин дар Федератсияи Россия Чжан Ханхуэй мулоқот кард. 

Дар дидор баргузории бомуваффақонаи мулоқоти сарварони давлатҳои СҲШ дар Душанбе махсус зикр шуд.

Дар суҳбат перомуни ҳолати кунунӣ ва дурнамои рушди муносибатҳои дӯстонаи Тоҷикистону Чин ва шарикии стратегии ҳамаҷониба мубодилаи афкор сурат гирифт.

 

 

Ҷопон ба Тоҷикистон техникаи роҳдорӣ тақдим кард

Аз ҷониби Ҳукумати Ҷопон ба Ҷумҳурии Тоҷикистон дар доираи «Барномаи рушди иҷтимоию иқтисодӣ» техникаву механизмҳои роҳдорӣ ҳамчун ёрии бебозгашт супурда шуд. Дар маросими қабули техникаи мазкур вазири нақлиёт Азим Иброҳим ва сафири фавқулода ва мухтори Ҷопон дар Тоҷикистон Такаюки Мияшита иштирок ва суханронӣ намуданд. 

Иқдоми навбатии Ҳукумати Ҷопон – кумаки бебозгашт ба маблағи як миллиард йени ҷопонӣ (тақрибан 9,7 миллион доллари ИМА) дар доираи «Барномаи рушди иҷтимоию иқтисодӣ» мебошад, ки оид ба ин қаблан Ёддошти тафоҳум ба имзо расида, бо қарори Маҷлиси намояндагони Маҷлиси Олӣ тасдиқ гардида буд.

Дар доираи лоиҳаи мазкур 57 техникаву таҷҳизот пешбинӣ шудааст ва дар навбати аввал 44 техникаву механизми роҳдорӣ ба кишвар ворид гашт. Аз ҷумла, 5 экскаватор, 15 боркунаки фронталӣ, 16 регпошак ва 8 барфрӯб.