Ба муносибати Ҷашни 30 - солагии Истиқлоли давлатии Ҷумҳурии Тоҷикистон бо иштироки раиси шаҳри Истаравшан Адҳам Маъмурзода, мардуми деҳа ва масъулони соҳа дар деҳаи Сӯфӣ - Орифи Ҷамоати деҳоти Зарҳалол хати нави оби нӯшокӣ ба истифода дода шуд. Бояд зикр намуд, дар деҳаи мазкур 8533 нафар ба сар мебарад.

Ба иттилои масъулон, сохтмони хати оби нӯшокӣ бо маблағгузории  Ҳукумати Ҷумҳурии Тоҷикистон ба анҷом расонда шуд. Оби ошомиданӣ аз Ҷамоати деҳоти Пошкент тавассути қубури полиэтилении қутраш 160 миллиметра аз масофаи 7 километр ҷорӣ гардида, аз қубури асосӣ ба деҳаи Сӯфӣ - Ориф дар ҳаҷми 22 литр дар як сония ҷорӣ мешавад.

Дар ин ҷода хизматҳои сокинони деҳа, хоссатан Шофозил Ҳомидов, Саидмурод Миразизов, Зафар Бониёзов, Хайрулло Бониёзов, Юнус Шарифов, Ҷамол Ҳасанов, Илҳом Ашуров, Шӯҳрат Одилов ва дигарон назаррас арзёбӣ мегардад.

Дар доираи татбиқи лоиҳаи мазкур аҳолии деҳа, беморхонаи минтақавӣ, муассисаи таълимии № 2 ва 1 бунгоҳи саломатӣ пурра бо оби тозаи ошомиданӣ таъмин мегарданд. 

Иқдоми мазкур дар заминаи дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти беҳтар намудани сатҳу сифати зиндагии аҳолии деҳот амалӣ гардидааст.

Мардуми сарбаланди деҳаи Сӯфӣ - Ориф аз ин туҳфаи арзанда хушҳол гардида, миннатдории худро ба Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Ҳукумати кишвар изҳор менамоянд. Зеро мушкили чандинсолаи онҳо дар арафаи Ҷашни 30-солагии Истиқлоли давлатӣ ҳал гардид.

 

Саъдулло САЙФУЛЛОЗОДА, рӯзноманигор