Имсол ғаллакорони ноҳияи Данғара, дар ҳамдастӣ бо олимони соҳа аз навъҳои тухмиҳои хушсифати "Фарғона", "Садоқат", "Краснодар-99", "Алекс", "Москва-56," "Ласточка" ва тухмии маҳаллии "Ормон", ки ба иқлими ноҳия мутобиқанд, дар асоси қоидаҳои агротехникӣ хеле хуб ба роҳ монда, аз майдони 20 ҳазору 568 гектар зиёда аз 68 ҳазору 610 тонна ғаллаи хушсифат гирифта, ҳосилнокиро аз ҳар гектар ба 33,6-сентнерӣ расонданд. 

Ҳамчунин, истеҳсоли дигар навъҳои ғалладона, аз қабили ҷав 5 ҳазору 781 тонна, лӯбиё 582 тонна ва ҷуворимакка 754 тонна расонда шуд, ки ин нисбат ба дурнамо хеле зиёд мебошад. Дар давраи нашъунамои зироатҳо мутахассисони соҳа ба ҳар гектар замин аз 150 то 400 киллоӣ нуриҳои минералӣ ва органикӣ доданд, ки дар рафти ҷамъоварӣ натиҷаи хуб ба бор овард. 

Тавре муовини аввали раиси ноҳия Ҷамшед Шарифзода ба хабарнигори махсуси «Ҷумҳурият» иттилоъ дод, Данғара дар соҳаи ғаллакорӣ, яке аз ноҳияҳои калонтарини ҷумҳурӣ ба ҳисоб рафта, дар сиёсати аграрии кишвар роҳи ҳалкунанда мебозад. Имсол дар натиҷаи истифодаи дурус-ти замин, тухмӣ, дар асоси қоидаҳои хуби агротехникӣ, инчунин, комбайну техникаҳои кишоварзӣ, ғаллакорони ноҳия ба натиҷаҳои хуби истеҳсолӣ комёб гаштанд. Дар ин ҷода, саҳми кооперативҳои истеҳсолию тиҷоратии «Раҳмонҷон», «Муҳсинҷон» ва «Сомонҷон» назаррас мебошад.

Барои аз зимистонҳои солҳои 2021 - 2022 солиму фарбеҳ ва ба маҳсулнокии баланд баровардани чорвои ҷамъиятӣ дар ноҳия то имрӯз ба миқдори 82 ҳазор тонна коҳ, 30 ҳазор тонна алафи табиӣ, 11 ҳазору 780 тонна тарбеда, дар маҷмуъ, зиёда аз 131 ҳазор тонна хӯроки дурушт захира шудааст. 

Ҳоло шудгори заминҳо дар ноҳия вусъати тоза касб намуда, кишоварзон аз тамоми техникаи кишоварзии дар ихтиёрашон буда самаранок истифода мебаранд. Онҳо мақсад доранд, ки барои ҳосили пурғановати соли оянда, заминаи боэътимод гузошта, беҳтарин навъҳои хушсифати тухмиро дар кишти тирамоҳӣ истифода баранд ва истеҳсоли ғалларо ба 70 ҳазор тонна расонанд.

 

Холназар КАСИРОВ, «Ҷумҳурият»