Ҳоким Холиқзода аз ҳамкории самарабахши ХБА ва дастгирии ин ниҳоди бонуфузи байналмилалии молиявӣ барои рушди иқтисодиёти Тоҷикистон изҳори қаноатмандӣ карда, ба Пётр Трабински, ки роҳбарии Гурӯҳи кишварҳои узви электоратро ба уҳда дошта, манфиат ва ташаббусҳои Ҷумҳурии Тоҷикистонро дар ХБА муаррифӣ менамояд, арзи сипос намуд.

Зикр гардид, ки паҳншавии бемории сироятии COVID-19 дар ҷаҳон ва суст шудани суръати рушди соҳаҳои иқтисодиёт дар бисёр мамолики олам, аз ҷумла шарикони асосии рушди Тоҷикистон, ба нишондиҳандаҳои иқтисодии мамлакат бетаъсир намонд. Дар ин росто дастгирии буҷети кишвар дар доираи Механизми фаврии қарздиҳӣ ва бахшидани қарз аз ҷониби ХБА, яке аз тадбирҳои назаррас барои коҳиш додани таъсири пандемияи COVID-19 ба иқтисодиёт, бахусус бахши молиявӣ арзёбӣ мегардад.

Бонки миллӣ ҳамчун мақоми танзимкунандаи бахши молиявию бонкӣ татбиқи сиёсати пулию қарзӣ ва асъориро баҳри мусоидат ба рушди иқтисодиёт, устувории низоми бонкӣ ва нигоҳдории сатҳи муътадили нархҳои дохилӣ равона намуда, новобаста аз маҳдудиятҳои бо пандемияи COVID-19 алоқаманд ва афзоиши фишорҳои берунӣ, низоми бонкии кишвар дар соли 2020 фаъолияти худро бо нишондиҳандаҳои мусбат ҷамъбаст намуд. Ҳоким Холиқзода барои идома бахшидани ҳамкорӣ бо ХБА изҳори омодагӣ намуда, барои мусоидати ХБА ҷиҳати тасдиқи барномаи нави ислоҳоти иқтисодӣ ба Ҷумҳурии Тоҷикистон ва татбиқи лоиҳаҳои кумакҳои техникӣ дар самти суботи молиявӣ, сиёсати пулию қарзӣ ҷиҳати гузариш ба ҳадафгирии таваррум, сиёсати асъорӣ, ҳисоббаробаркуниҳои ғайринақдӣ изҳори ҳавасмандӣ кард.

Дар мулоқоти корӣ масъалаи татбиқи босамари сиёсати пулию қарзӣ ва асъорӣ, сиёсати фискалӣ, пешгирии пайомадҳои манфии пандемияи COVID-19 ба иқтисодиёти миллӣ ва низоми молиявии кишвар, тадбирҳои амалишударо  баҳри бартараф кардани оқибатҳои он бо истифода аз тамоми имкониятҳо мавриди баррасӣ қарор гирифт. Мудири иҷроияи Хазинаи байналмилалии асъор (ХБА) Пётр Трабински, ки бори нахуст ба Ҷумҳурии Тоҷикистон ташриф овардааст, аз пазироии самимӣ ва пешниҳоди маълумоти мушаххас ба роҳбарияти БМТ изҳори сипос карда,  барои густариш додани ҳамкориҳо бо Ҷумҳурии Тоҷикистон омодагии хешро баён намуд. 

Ҳамзамон, мудири иҷроияи ХБА барои баррасӣ ва тавсеа бахшидани ҳамкориҳо дар самтҳои гуногуни сиёсати пулию қарзӣ ва низоми бонкӣ роҳбарияти Бонки миллии Тоҷикистонро ҷиҳати иштирок дар ҷаласаҳои солонаи ХБА ва Гурӯҳи Бонки ҷаҳонӣ, институтҳои байналмилалӣ даъват  кард.