ТАСС. Неруҳои дастаҷамъии Созмони Аҳдномаи амнияти дастаҷамъӣ   дар чаҳорчӯбаи машқҳои амалиётӣ - стратегии «Иттиҳоди ҳарбӣ» машқҳои низомиро дар қаламрави Тоҷикистон мегузаронанд. 

«Дар машқҳои ҳарбии «Эшелон-2021»,  «Ҷустуҷӯ-2021», «Ҳамкорӣ-2021», ки дар машқгоҳҳои «Момирак» ва «Ҳарбмайдон» дар Тоҷикистон баргузор мешаванд, чаҳор ҳазор низомӣ ва беш аз 500 таҷҳизоти ҳарбӣ ширкат хоҳанд кард», - гуфта мешавад дар хабар. 

Зикр мешавад, ки дар машқҳои «Эшелон» ташкили таъминоти моддию техникӣ ҳангоми омодагӣ ва амалиёти муштарак тамрин хоҳанд шуд. Омӯзиши махсуси «Ҷустуҷӯ» ба ташкил ва гузарондани иктишоф ба манфиати амалиёт нигаронда шудааст. Дар машқҳои «Ҳамкорӣ-2021» масъалаҳои гузарондани амалиёти муштарак оид ба бартараф намудани муноқишаи мусаллаҳонаи марзӣ, ки бо кӯшиши вуруд ба қаламрави кишвари узви СААД аз ҷониби ҷангиёни созмонҳои байналмилалии террористӣ алоқаманд аст, роҳандозӣ мешаванд.

 

 

Миссияи ИДМ: «Маъракаи интихобот дар Ӯзбекистон бо рақобати солим хоҳад гузашт»

Мир24. «Ба андешаи миссия, дар маҷмуъ, маъракаи интихоботӣ дар фазои ором, дар руҳияи рақобати ошкоро ва дар сатҳи баланди ташкилӣ баргузор мешавад», - омадааст дар изҳорот барои ВАО пас аз натиҷаҳои мониторинги муваққатии интихобот.

Миссия моҳи сентябри соли равон ба кори назорат бар интихоботи президентии Ӯзбекистон шуруъ кард. Он 162 нозирро дар бар мегирад. Ситоди гурӯҳи пешҳангом дар пойтахти Ӯзбекистон таъсис ёфтааст. Миссияро котиби иҷроияи ИДМ Сергей Лебедев роҳбарӣ мекунад. Тибқи маълумоти мониторинг, комиссияҳои ҳавзавӣ ва участкавӣ барои кори худ тамоми шароити заруриро доранд. Онҳо бо нақлиёт, компютер, алоқа, инчунин, адабиёти ҳуқуқии дахлдор таъмин шудаанд.  

 

 

ИА таҳримҳои зидди ДИ ва «Ал-Қоида»-ро то октябри 2022 тамдид мекунад

ТАСС. Шурои Иттиҳоди Аврупо режими таҳримҳоро алайҳи гурӯҳҳои террористии «Давлати исломӣ» ва «Ал-Қоида» (мамнуъ дар Тоҷикистон), инчунин, шахсони алоҳида, созмонҳо ва корхонаҳои марбут ба он то 31 октябри соли 2022 тамдид кард. Дар ин бора дар изҳороте, ки Шурои Иттиҳоди Аврупо интишор кард, гуфта шудааст.

Чораҳои маҳдудкунанда, аз ҷумла манъи вуруд ба Иттиҳоди Аврупо ва муваққатан боздоштани дороиҳо, ба шаш нафар дахл дорад. Тавре дар изҳорот таъкид шудааст, шаҳрвандон ва созмонҳои кишварҳои Иттиҳоди Аврупо ҳуқуқ надоранд, ки ба онҳо ёрии молиявӣ расонанд.

Тавре ки дар Шурои Иттиҳоди Аврупо таъкид шуд, режими кунунии таҳримҳо ба Брюссел имкон медиҳад, ки нисбат ба шахсоне, ки ҳамлаҳои террористӣ анҷом ё онҳоро таҳрик медиҳанд, инчунин, ба террористон  ёрӣ мерасонанд, аз ҷумла кумак ба ДИ, «Ал-Қоида» ва сохторҳои марбута дар ҷалби аъзои нав, маҳдудиятҳои мақсаднок ҷорӣ намояд.

Рӯйхати сиёҳи зиддитеррористии Иттиҳоди Аврупо бар зидди ДИ ва «Ал-Қоида» яке аз кӯтоҳтарин рӯйхатҳои таҳримҳои Иттиҳоди Аврупо дар даҳсолаи охир мебошад.