Дар ҷаласаи навбатии Шурои Маҷлиси намояндагон, ки таҳти раёсати Раиси Маҷлиси намояндагони Маҷлиси Олӣ Маҳмадтоир Зокирзода баргузор гардид, Созишнома миёни Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин дар бораи пешниҳоди кумаки бебозгашт мавриди баррасӣ қарор гирифт.

Созишнома бо сафарбаркунонии ҳайати коршиносони чинӣ ҷиҳати омодасозии лоиҳаи Асосноккунии техникӣ - иқтисодӣ аз ҷониби Ҳукумати Ҷумҳурии Мардумии Чин пешниҳоди кумаки бебозгаштро дар ҳаҷми ҳаштсад миллион юани чинӣ пешбинӣ намудааст.

Ҳукумати Чин ба Ҳукумати Тоҷикистон барои ҷудо намудани кумаки молиявии бебозгашти иловагӣ лоиҳа оид ба сохтмони майдонҳои қисман калидии марҳилаи дуюми роҳи автомобилгарди Душанбе - Кулма, қитъаи Қалъаи Хумб - Ванҷ ва татбиқи лоиҳаҳои дигари басозишрасидаро пешниҳод  кардааст.

 

 

Машқҳои муштараки низомии СААД дар Тоҷикистон

Дар доираи Раёсати Ҷумҳурии Тоҷикистон дар Созмони Аҳдномаи амнияти дастаҷамъӣ аз 18 то 23 октябри соли 2021  дар  машқгоҳҳои  низомии “Ҳарбмайдон” ва “Ҳомиён”-и ҳудуди гарнизони Хатлон машқҳои муштараки махсуси васеи ҳарбӣ, таҳти унвони “Ҷустуҷӯ”, “Эшалон” ва “Ҳамоҳангӣ-2021” баргузор мегардад, ки дар он чор ҳазор низомии Қувваҳои Мусаллаҳи кишварҳои аъзои СААД ширкат менамояд.

Ба иттилои маркази матбуоти Вазорати мудофиаи  Ҷумҳурии Тоҷикистон,  дар  ин размоиш, инчунин, чархболҳои  "МИ-8", "МИ-24", ҳавопаймоҳои ҳуҷумкунанда, муҳорибавию зарбазан ва бомбаандозу қиркунанда, 50 техникаи зиреҳпӯши ҷангиву махсус, тӯп ё худ воситаҳои гуногуни артиллерӣ, миқдори зиёди техникаи автомобилӣ, силоҳу муҳимоти ҳозиразамони ҳарбӣ ва дигар лавозимоти махсуси низомӣ истифода мешаванд.

Дар баробари ин, дар машқгоҳи ҳарбии “Ҳомиён”-и ҳудуди шаҳри Кӯлоб дар як вақт тамринҳои ҳарбии Тоҷикистону Россия низ идома доранд.

Размоиши дуҷонибаи Тоҷикистону Россия 22 октябр дар машқгоҳи “Ҳомиён” ва даври ниҳоии машқҳои муштараки “Ҷустуҷӯ”, “Эшалон” ва “Ҳамоҳангӣ-2021” 23 октябр дар машқгоҳи “Ҳарбмайдон” натиҷагирӣ мешаванд.

 

 

Мулоқот бо Миссияи Бонки ҷаҳонӣ

Муовини якуми вазири тандурустӣ ва ҳифзи иҷтимоии аҳолии Ҷумҳурии Тоҷикистон Ғафур Муҳсинзода бо Миссияи Бонки ҷаҳонӣ барои дастгирии татбиқи Лоиҳаи фавқулодаи муқовимат бо вируси COVID-19 дар Тоҷикистон мулоқот намуд.

Ҷонибҳо доир ба татбиқи лоиҳаи мазкур, ки ба пешгирии бемории коронавируси нави COVID-19 дар Тоҷикистон равона гардида, аз ҷониби Бонки ҷаҳонӣ маблағгузорӣ мешавад, мубодилаи афкор намуданд.

Бояд  гуфт, ки  “Лоиҳаи  фавқулодаи  муқовимат бо вируси COVID - 19 дар Тоҷикистон” дар доираи Созишномаи маблағгузорӣ байни Ҳукумати  Ҷумҳурии Тоҷикистон ва Бонки ҷаҳонӣ (гранти №D604-TJ) ба тасвиб расидааст.

То имрӯз дар доираи лоиҳа дар самти пешгирии бемории коронавирус дар мамлакат як қатор тадбирҳои муҳиму саривақтӣ амалӣ шудаанд.

 

 

Мавсими нави гармидиҳӣ оғоз гардид

Шуруъ аз 18 октябри соли 2021 Маркази барқу гармидиҳии шаҳри Душанбе  ба кор оғоз намуд, - хабар медиҳад ШСХК «Барқи тоҷик». Тавре мутахассисон иброз доштанд, марказ баъди як-ду рӯз пурра ба реҷаи муқаррари корӣ ворид мегардад.

Имсол нархи гармӣ тағйир наёфтааст. Барои аҳолӣ маблағи пардохт барои 1 метри мураббаи майдони гармшаванда бо назардошти ААИ 1,18 сомониро ташкил медиҳад. Барои ташкилоти буҷетӣ - 98,67 сомонӣ барои 1 Гккал гармӣ (бе назардошти ААИ), барои ҳамаи истеъмолкунандагони дигар - 113,47 сомонӣ барои 1 Гккал гармӣ (бе назардошти ААИ).

Маркази барқу гармидиҳии рақами 2 бо истифода аз ангишт кор мекунад ва барои мавсим ба анборҳои он соли ҷорӣ қариб 820 ҳазор тонна ангишт кашонда шудааст. 

Дар ин мавсим 2762 бинову иншооти шаҳри Душанбе бо гармӣ таъмин мегарданд, ки нисбат ба соли гузашта 200 бинову иншоот зиёд мебошад.